იზორია: ვისაც გაუჩნდება სურვილი განახორციელოს აგრესია, უნდა დაფიქრდეს, თუ რა დიდ ზიანს მიაყენებს საქართველო აგრესორს

2017-05-27 12:47:58, 2163 ნახვა

კომენტარი სამხედრო

"ვისაც გაუჩნდება სურვილი განახორციელოს მორიგი აგრესია საქართველოზე, უნდა დაფიქრდეს თუ რა დიდ ზიანს მიაყენებს საქართველო აგრესორს, თავისი საბრძოლო მომზადების მაღალი ხარისხით“, - ამის შესახებ საქართველოს თავდაცვის მინისტრმა ლევან იზორიამ ნატო-ს საპარლამენტო ასამბლეის თავდაცვისა და უშიშროების კომიტეტის სხდომაზე სიტყვით გამოსვლისას განაცხადა.

მინისტრმა უწყებაში განხორციელებული რეფორმების შესახებ ისაუბრა და აღნიშნა, რეფორმები ნატო-ს ბოლო ორ სამიტზე მიღებული სტრატეგიული გადაწყვეტილებების საფუძველზე ხორციელდება.

„ჩვენ როდესაც 2016 წლის აგვისტოდან დავიწყეთ რეფორმები პირველ რიგში მოვახდინეთ, ნატო-ს ბოლო ორ სამიტზე მიღებული სტრატეგიული გადაწყვეტილებების იდენტიფიცირება და ჩვენი რეფორმები ამ სტრატეგიული გადაწყვეტილებების ფარგლებში განვახორციელეთ. ჩვენ ოთხი სტრატეგიული მიმართულების ფარგლებში განვსაზღვრეთ საქართველოში თავდაცვის რეფორმების პრიორიტეტები. განახლებულ შეკავების პოლიტიკისა და თავდაცვისუნარიანობის ამაღლების მხრივ, ჩვენ ჩავატარეთ მნიშვნელოვანი რეორგანიზაცია და ოპტიმიზაცია. ეს საკმაოდ მტკივნეული პროცესი იყო. მიზანი გახლდათ თანხების მობილიზება იმ პრიორიტეტული პროექტების განხორციელებისთვის, რაც ჩვენს საბრძოლო მზადყოფნას გააძლიერებდა, ჩვენი ქვეყნის თავდაცვისუნარიანობას უფრო ძლიერს გახდიდა. ამის შედეგად ჩვენ დავზოგეთ მილიონობით თანხა და მივმართეთ დიდწილად თავდაცვითი ინფრასტრუქტურის მშენებლობისკენ, ასევე აღჭურვილობის შეძენისკენ“, - განაცხადა თავდაცვის მინისტრმა და დასძინა, რომ საქართველოს მიზანი საფრთხეებთან უფრო ადაპტირებადი შეიარაღებული ძალების ჩამოყალიბებაა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან