იან კელი: საქართველოს მთავრობას მოვუწოდეთ, კრიტიკული ხმების ხალხისადმი წვდომა უზრუნველყოფილი იყოს

2017-03-06 15:12:58, 666 ნახვა

საქართველოში ამერიკის შეერთებული შტატების ელჩის იან კელის განცხადებით, ის მედიაპლურალიზმს მხარდაჭერას უცხადებს.

როგორც ელჩმა აღნიშნა, მედია მნიშვნელოვანია, იმისთვის, რომ მთავრობა იყოს პასუხისმგებლიანი და დემოკრატიამ ხალხის ნების შესაბამისად იმუშაოს.

„ყველამ კარგად იცით, რომ მედიაპლურალიზმის ძლიერი მხარდამჭერი ვარ. მეც მქონდა დაძაბულობა ჟურნალისტებთან, როდესაც სახელმწიფო დეპარტამენტში ვმუშაობდი. ძალიან ვნერვიულობდი, როდესაც მოდიოდნენ ბრიფინგზე და ცდილობდნენ, გულახდილი ვყოფილიყავი. მაშინ დავაფასე, თუ რამდენად მნიშვნელოვანია მედია, რომ მთავრობა იყოს პასუხისმგებლიანი და დემოკრატიამ ხალხის ნების შესაბამისად იმუშაოს“, - განაცხადა იან კელიმ.

კელის თქმით, ქვეყანაში კრიტიკული აზრი უნდა ისმოდეს, რომელშიც ძლიერი ოპოზიცია იგულისხმება.

„ვგულისხმობ, ძლიერ ოპოზიციას, რომელსაც შეუძლია გამოხატოს საპირისპირო აზრი, თუნდაც როდესაც ამის მოსმენა რთული იყოს. სწორედ ამიტომ, ჩვენს მიმართვაში საქართველოს მთავრობას მოვუწოდეთ, ყველა ხმის, მათ შორის, მთავრობისადმი კრიტიკული ხმების წვდომა უზრუნველყოფილი იყოს. მთავრობამ უნდა დაიცვას კრიტიკული ხმები და უზრუნველყოს მათი წვდომა ხალხისადმი, რომ ხალხმა ეს კრიტიკა გაიგოს. ჩვენ განვაგრძობთ მედიის დამოუკიდებლობის მხარდაჭერას“, - განაცხადა აშშ-ს ელჩმა.