დაცვის მხარე ზურაბ ვაზაგაშვილის საქმეში ახალ ფოტომასალას ავრცელებს

2015-01-12 14:40:16, 3975 ნახვა

სამართალი

დაცვის მხარე ზურაბ ვაზაგაშვილის საქმეში გარდაცვლილის ახალ ფოტომასალას ავრცელებს. ფოტოები დამოუკიდებელმა ექსპერტმა მაია ნიკოლეიშვილმა შეისწავლა.
როგორც ადვოკატმა ნიკოლეიშვილთან ერთად გამართულ დღევანდელ პრესკონფერენციაზე განაცხადა, ფოტოთი დგინდება, რომ ზურაბ ვაზაგაშვილს სასიკვდილო ჭრილობა თავის არეში ახლოდან და მარცხნიდან აქვს მიყენებული. ადვოკატი ირწმუნება, რომ 2006 წელს ჩატარებული ე.წ. სპეცოპერაცია, გამიზნული მკვლელობა იყო.
"დაცვის მხარემ მოიძია არაერთი ინფორმაცია. გამოიკითხა მომხდარი ფაქტის არაერთი თვითმხილველი პირი და ჩატარდა არაერთი ექსპერტიზა. უტყუარად დადასტურდა, რომ 2006 წლის 2 მაისს ამ ე.წ. სპეცოპერაციის დროს, ზურაბ ვაზაგაშვილს განზრახ მკველოლობა განხორციელდა",-აღნიშნა ადვოკატმა.
"სროლის მანძილი განსაზღვრული არ არის.თუ ეს მოხდა ახლოდან, როგორც ჩვენ ახლა დავადგინეთ, მაშინ გამოდის, რომ ზემდგომი პირი მას უკვე დაზიანებას აყენებს მიზანმიმართულად ახლო მანძილიდან და ეს რასაც ნიშნავს თქვენც ძალიან კარგად იცით",-განაცხადა მაია ნიკოლეიშვილმა.
შეგახსენებთ, ზურაბ ვაზაგაშვილი 2006 წლის 2 მაისს საქართვლოს შინაგან საქმეთა სამინისტროს თანამშრომლების მიერ თბილისში, კორტების მიმდებარე ტერიტორიაზე ჩატარებული სპეცოპერაციის შედეგად დაიღუპა.