თავისუფლების მოედანზე აქციისთვის მზადება დასრულდა

2015-03-21 12:30:17, 297 ნახვა

თბილისში, თავისუფლების მოედანზე, „ერთიანი ნაციონალური მოძრაობის“ აქციისთვის მზადება დასრულებულია.

საკრებულოს შენობის წინ სცენა და მონიტორებია დამონტაჟებული.

როგორც „ნაციონალური მოძრაობის“ ლიდერები აცხადებენ, აქციისთვის ყველაფერი მზად არის და ისინი ბევრ მხარდამჭერს ელოდებიან.

„დღეს ვიკრიბებით კონკრეტული მიზნით, რომ საქართველოში უნდა დასრულდეს ის უუნარობა, რაც ხდება დღეს, ის უნიათობა, რომელმაც მიიყვანა ადამიანები სამუშაო ადგილების დაკარგვამდე, ლარის გაუფასურებასა და ეკონომიკური მდგომარეობის განადგურებამდე. სანამ ქვეყანა გაკოტრდება ჯობია გადადგეს მთავრობა, გადადგეს პრემიერ-მინისტრი“, - განაცხადა „ნაციონალური მოძრაობის“ ერთ-ერთმა ლიდერმა გიორგი ვაშაძემ.

თავისუფლების მოედანზე საპატრულო პოლიციის ეკიპაჟები მობილიზებულია. მიმდებარე ტერიტორია უკვე გადაკეტილია.

შეგახსენებთ, დღეს „ერთიანი ნაციონალური მოძრაობა“ მთავრობის გადადგომის მოთხოვნით საპროტესტო აქციას გამართავს. აქცია თბილისში, თავისუფლების მოედანზე გაიმართება. აქციის დაწყებამდე იქნება ორი დიდი შეკრება: ერთი ვარდების მოედანზე, ხოლო მეორე კოლმეურნეობის მოედანზე, საიდანაც თავისუფლების მოედნისკენ მსვლელობა მოეწყობა. აქცია 16:00 საათისთვის დაიწყება.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან