2015-03-20 19:24:39, 307 ნახვა

---

დანაშაულის პრევენციის ცენტრისა და საიას „იურიდიული განათლების ხელშეწყობის ფონდის“ ერთობლივი პროექტი დასრულდა

საქართველოს იუსტიციის სამინისტროს მმართველობის სფეროში მოქმედი სსიპ „დანაშაულის პრევენციის ცენტრის“ ახალგაზრდული პროგრამის „ლიდერთა სახლის“ მონაწილეებისთვის ადამიანის უფლებების შესახებ მორიგი პროექტი დასრულდა. 

პროექტი საქართველოს ახალგაზრდა იურისტთა ასოციაციის (საია) „იურიდიული განათლების ხელშეწყობის ფონდის“ დახმარებით  განხორციელდა. 

მასში 25 მოსწავლე მონაწილეობდა, რომლებსაც სერტიფიკატები იუსტიციის სამინისტროს დანაშაულის პრევენციის ცენტრის დირექტორმა ჯონი კვინიკაძემ გადასცა.

 „ამ პროექტის მიზანი არაფორმალური განათლების გზით არასრულწლოვნებში სამართლებრივი ცნობიერების ამაღლებაა. ვფიქრობ, რომ ადამიანის უფლებების შესახებ  ამ სემინარებზე მიღებული ცოდნა ახალგაზრდებისთვის დროული და მნიშვნელოვანია“, აღნიშნა ჯონი კვინიკაძემ.

 „იურიდიული განათლების ხელშეწყობის ფონდის“ ტრენერის ნინო ბაღაშვილის ინფორმაციით, მოსწავლეებმა სულ ხუთი სემინარი მოისმინეს.  „შეხვედრები ლექციების, დისკუსიების, ვიდეოჩვენებებისა და სიმულაციური თამაშების მეთოდებით მიმდინარეობდა. განიხილებოდა  ადამიანის უფლებების ცნება, ადამიანის უფლებების კლასიფიკაცია, უფლებების დაცვის მექანიზმები, სიცოცხლის უფლება, წამების აკრძალვა, დისკრიმინაცია. მოსწავლეები აქტიურად იყვნენ ჩართულნი დისკუსიებშიც “, განაცხადა ნინო ბაღაშვილმა.  

 იუსტიციის სამინისტროს დანაშაულის პრევენციის ცენტრის ახალგაზრდული პროგრამა „ლიდერთა სახლი" საქართველოს მასშტაბით 13 ქალაქში მიმდინარეობს. პროგრამის მიზანია სამოქალაქო და იურიდიული ცნობიერების ამაღლება, მოხალისეობრივი საქმიანობის წახალისება, შემოქმედებითი ინიციატივების განვითარება, დამოუკიდებელი აზროვნების ხელშეწყობა და დანაშაულის პრევენცია.

 

---

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

---

დღის თემა

მთავარი თემა

ინტერვიუ - ექსკლუზივი