მარნეულის #48-ე საარჩევნო უბანზე ხელმეორედ ხმის მიცემის მცდელობის რამდენიმე ფაქტი დაფიქსირდა

2016-10-30 18:55:13, 333 ნახვა

მარნეულის #48-ე საარჩევნო უბანზე რამდენიმე ფაქტი დაფიქსირდა, როდესაც მარკირება გავლილი ამომრჩეველი ხმის მიცემას ცდილობდა, - ამის შესახებ ახალაზგრდა იურისტთა ასოციაციის თავმჯდომარემ ანა ნაცვლიშვილმა ბრიფინგზე განაცხადა.

როგორც ნაცვლიშვილმა აღნიშნა, კენჭისყრის პროცედურები ძირითადად მშვიდობიან ვითარებაში მიმდინარეობს, თუმცა ადგილი აქვს რამდენიმე დარღვევას.

„მარნეულის, #48-ე საარჩევნო უბანზე მარკირება გავლილი ამომრჩეველი ხმის მიცემას ცდილობდა. კარგია, რომ კომისიის თავმჯდომარემ აღნიშნული მცდელობები აღმოფხვრა. ამასთან, სადამკვირვებლო ორგანიზაცია „მწვანე დედამიწის“ წარმომადგენელი გამოდიოდა შენიშნვით, რომ მარკირება გავლილ ადამიანებს უნდა ჰქონოდათ შესაძლებლობა კვლავ მიეღოთ მონაწილეობა კენჭისყრაში“, - განაცხადა ნაცვლიშვილმა.

საია-ს თავმჯდომარემ, კირვალის #47-ე უბანზე მომხდარ სიტყვიერ შეურაცხყოფაზეც ისაუბრა.

„კირვალის #47-ე უბანზე ჩვენს დამკვირვებელს სიტყვიერი შეურაცხყოფა მიაყენა მოქალაქემ. ზოგადად ამ უბანზე ჩვენს დამკვირვებელს მთელი დღის განმავლობაში გარკვეული პრობლემები ჰქონდა, რომელიც უზღუდავდა მას უფლებამოსილების განხორციელებას. ასევე დაფიქსირდა რამდენიმე შემთხვევა, როდესაც მარკირების შემმოწმებელი აპარატურა აფიქსირებდა მარკირებას, მაშინ როდესაც ამომრჩეველი ქალბატონები საუბრობენ, რომ ფჩხილზე აქვთ ლაქი და ეს არ არის მარკირების პროცედურა“, - აღნიშნა ანა ნაცვლიშვილმა.

მისივე განმარტებით, ეს ფაქტები მიუთითებს იმაზე, რომ შესაძლოა იყოს მარკირების ხარვეზი.

„მნიშვნელოვანია, რომ ეს საკითხი სათანადოდ გამოიკვლიონ“, - განაცხადა ნაცვლიშვილმა.