ფაგების გამოყენება თევზის დაავადების ბაქტერიებს გაანადგურებს

2016-08-10 17:21:01, 790 ნახვა

საზოგადოება

სოფლის მეურნეობის სამეცნიერო-კვლევითი ცენტრის მეცხოველეობის, ვეტერინარიისა და საკვებწარმოების კვლევისა და ბიოაგროწარმოების სამსახურის წარმომადგენლები ბაქტერიოფაგიის, მიკრობიოლოგიისა და ვირუსოლოგიის ინსტიტუტის წარმომადგენლებს შეხვდნენ.

სოფლის მეურნეობის სამინისტროს ინფორმაციით, შეხვედრაზე საქართველოში აკვაკულტურის განვითარებასა და ბიოლოგიურად სუფთა, მაღალი ხარისხის თევზის წარმოების მნიშვნელობაზე ისაუბრეს. განხილვის მთავარ საკითხს მტკნარი წყლის თევზის კულტურებში ფაგების გამოყენება წარმოადგენდა.

ბაქტერიოფაგიის, მიკრობიოლოგიისა და ვირუსოლოგიის ინსტიტუტის მიკრობული ეკოლოგიის ლაბორატორიის მთავარმა მეცნიერ-თანამშრომელმა ნინო ჯანელიძემ შეხვედრის მონაწილეებს პროექტი „ფაგების გამოყენებაზე დაფუძნებული ეკოლოგიურად უსაფრთხო სტრატეგია მტკნარი წყლის თევზის კულტივირებად სახეობებში ბაქტერიული ინფექციების კონტროლისათვის“ გაცნო. პროექტი შოთა რუსთაველის ეროვნული სამეცნიერო ფონდის და უკრაინაში მეცნიერების და ტექნოლოგიების განვითარების ცენტრის მიერაა დაფინანსებული.

შეხვედრაზე სოფლის მეურნეობის სამეცნიერო-კვლევითი ცენტრის მეცხოველების, ვეტერენირიისა და საკვებწარმოების კვლევის დეპარტამენტის სპეციალისტმა, ელდარ კაშიამ აღნიშნა, რომ გასულ წელს საქართველოში კალმახის მასიური სიკვდილიანობა დაფიქსირდა და ფერმერებმა 60-80% თევზი დაკარგეს. აღნიშნული პროექტი კი, სპეციალისტებს საშუალებას აძლევს ფაგების გამოყენებით გაანადგურონ დაავადების ბაქტერიები, რომელიც თევზის სიკვდილიანობის მიზეზი ხდება.

უახლოეს მომავალში სსიპ სოფლის მეურნეობის სამეცნიერო -კვლევით ცენტრსა და სსიპ სსიპ გიორგი ელიავას სახელობის ბაქტერიოფაგიის, მიკრობიოლოგიისა და ვირუსოლოგიის ინსტიტუტს შორის ურთიერთანამშრომლობის მემორანდუმი გაფორმდება, რაც მხარეებს საშუალებას მისცემს აღნიშნული პროექტი წარმატებით და ეფექტურად განხორციელდეს.

შეხვედრას სოფლის მეურნეობის სამინისტროსა და სურსათის ეროვნული სააგენტოს წარმომადგენლები ესწრებოდნენ.

(NS)

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან