ნიკა რურუა: პრეზიდენტს ძლიერი კონსტიტუციური უფლებები აქვს და მან ეს უნდა გამოიყენოს

2015-02-26 18:22:40, 352 ნახვა

"საუბარი, რომ პრეზიდენტი უძალოა საქართველოში და პრეზიდენტის თანამდებობა ფიქციურია, ტყუილია",-ამის შესახებ ექსპერტმა ნიკა რურუამ პრეზიდენტთან მიმდინარე შეხვედრის დაწყებამდე ჟურნალისტებს განუცხადა.
მისივე თქმით, შეხვედრაზე ყველა იმ საკითხზე მოისმენს პრეზიდენტის შეხედულებას, რაც მიაჩნია, რომ სათანადოდ არ სრულდება.
რურუას განმარტებით, პრეზიდენტს ძლიერი კონსტიტუციური უფლებები აქვს, რაც უნდა გამოიყენოს.
"ვიმსჯელებ იმაზე, რაც მეჩვენება, რომ ამწუთას ისე არ კეთდება, როგორც შეიძლება უნდა კეთდებოდეს.პასიურობაზე, რომელსაც ჩვენი საგარეო საქმეთა სამინისტრო იჩენს.იმ გაშვებულ შესაძლებლობებზე, რომლებიც აშკარად სხვადასხვა მოვლენების გამო საქართველოს ჰქონდა და ჩვენ ხელიდან ვუშვებთ ამას, ყოველდღიურად ვკარგავთ საერთაშორისო ტრიბუნას ჩვენი საკითხების წარმოსაჩენად და ამ ყველაფერზე ვეცდები, მოვისმინო პრეზიდენტის შეხედულებები და რაღაცნაირად ვურჩიოთ მას ჩვენი აზრით, სწორი ნაბიჯების გადადგმა, რადგან ის მითი, რომ პრეზიდენტი უძალოა საქართველოში და ფაქტობრივად ფიქციური პოზიციაა, ეს ტყულია. საქართველოს პრეზიდენტი უმაღლესი ლეგიტიმურობის პოლიტიკური ფიგურაა, მას საკმაოდ ძლიერი კონსტიტუციური უფლებები აქვს და საჭიროა, მან ეს ყველაფერი გამოიყენოს",-განაცხადა ნიკა რურუამ.
ცნობისთვის, გიორგი მარგველაშვილი ამწუთებში აფხაზეთისა და სამხრეთ ოსეთის თემაზე 12 ექსპერტს ხვდება. ესენია: კორნელი კაკაჩია, სერგი კაპანაძე, იაგო კაჭკაჭიშვილი, ბაკურ კვაშილავა, შორენა ლორთქიფანიძე, ირაკლი მენაღარაშვილი, ალექსანდრე რუსეცკი, დავით სიხარულიძე, ბათუ ქუთელია, სოსო ცისკარიშვილი, თორნიკე შარაშენიძე, ნიკა რურუა. შეხვედრას ასევე ესწრებიან ეროვნული უშიშროების საბჭოს მდივანი, პრეზიდენტის ადმინისტრაციის უფროსი და პრეზიდენტის ადმინისტრაციის უფროსის მოადგილე.