თბილისის მერი დავით ნარმანია ავსტრიის საგანგებო და სრულუფლებიან ელჩს  საქართველოში, აქსელ ვეხს  შეხვდა.

როგორც „ექსპრესნიუსს“ თბილისის მერიიდან აცნობეს,  შეხვედრას  ავსტრიის სოფლის მეურნეობის, გარემოს დაცვისა და წყლის რესურსების მართვის სამინისტროს ექსპერტთა ჯგუფი ესწრებოდა.

მათივე ცნობით, დედაქალაქის მერიაში გამართულ შეხვედრაზე საუბარი შეეხო თბილისსა და ავსტრიის ქალაქებს შორის გარემოს დაცვისა და ბუნებრივი კატასტროფების რისკების შემცირების სფეროში თანამშრომლობის პერსპექტივებს.

დავით ნარმანიას თქმით, თბილისში 2015 წლის ივნისში მომხდარი  სტიქიის შემდეგ ბუნებრივი კატასტროფების რისკების შემცირების საკითხი დედაქალაქში განსაკუთრებით აქტუალურია. თბილისის მერმა  ამ სფეროში ავსტრიელი გარემოს დაცვის ექსპერტების გამოცდილების გაზიარების მნიშვნელობაზე ისაუბრა და ავსტრიის ელჩს მხარდაჭერისთვის მადლობა გადაუხადა. 

ავსტრიის საელჩოს მხარდაჭერით, თბილისში, ავსტრიელი ექსპერტების ტექნიკური დახმარების პროგრამა ხორციელდება. პროგრამის ფარგლებში ავსტრიელი ექსპერტები გარემოს ეროვნული სააგენტოს სპეციალისტებთან ერთად მტკვრის შენაკადებზე, წავკისის წყლის,  დიღმისხევის და  ხევძმარას მდინარეების აუზებში  არსებულ სტიქიურ მოვლენებს შეისწავლიან. სპეციალისტები  სტიქიური პროცესების ადგილზე შეფასების შემდეგ  მაღალი რისკის შემცველ ადგილებს გამოავლენენ და შესაბამის რეკომენდაციებს მოამზადებენ.  შემაჯამებელი დასკვნის საფუძველზე ექსპერტები, საბოლოოდ,  რისკის მქონე უბნების რუკებს შეადგენენ.

შეხვედრაზე ელჩმა აქსელ ვეხმა აღნიშნა, რომ  ბოლო თვეების განმავლობაში, თბილისში,  სტიქიური კატასტროფების რისკების შემცირების მიმართულებით მნიშვნელოვანი ნაბიჯები იდგმება. ავსტრიელი ექსპერტების დახმარება კი დედაქალაქის ხელმძღვანელობას ამ მიმართულებით არსებული გამოწვევების დაძლევაში დაეხმარება.      

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

„თეგეტამ“ რუსთავის ჭალის ტყის აღდგენისთვის გამწვანების აქცია გამართა

საპატრიარქომ იობის განათლება აღიარა და მას შესაბამისი ხარისხი მიანიჭა

აპრილში „ექსპრესნიუსი“ 1.7 მილიონჯერ წაიკითხეს, სოციალურ ქსელებში, ახალ ამბებს 11 მილიონი ადამიანი გაეცნო

რუსეთის ტერიტორიის მეოთხედი და მოსახლეობის 70% უკრაინული დრონების მოქმედების რადიუსში იმყოფება