სოფლის მეურნეობის სამეცნიერო-კვლევითი ცენტრის დირექტორი ჩინეთში იმყოფებოდა

2016-04-21 10:40:57, 638 ნახვა

საზოგადოება

სოფლის მეურნეობის სამეცნიერო-კვლევითი ცენტრის დირექტორი, პროფესორი ლევან უჯმაჯურიძე სამუშაო ვიზიტით ჩინეთის სახალხო რესპუბლიკაში იმყოფებოდა.

სოფლის მეურნეობის სამინისტროს ინფორმაციით, ვიზიტის ფარგლებში, ცენტრის დირექტორმა მონაწილეობა მიიღო ჩინეთის სახალხო რესპუბლიკის უცხოელი ექსპერტების საქმეთა სახელმწიფო ადმინისტრაციის (SAFEA) მიერ ორგანიზებულ საერთაშორისო ექსპერტთა კონფერენციასა და გლობალურ ინტელექტუალურ ფორუმში.

გლობალური ინტელექტუალურ ფორუმის გამოფენაზე წარმოდგენლი იყო სოფლის მეურნეობის სამეცნიერო-კვლევითი ცენტრის სტენდი, სადაც ფორუმის მონაწილე ექსპერტები და დაინტერესებული პირები გაეცნენ ცენტრის სამეცნიერო-კვლევით მიმართულებებს.

აღნიშნული ღონისძიებების ფარგლებში სოფლის მეურნეობის სამეცნიერო-კვლევითი ცენტრის დირექტორმა ურთიერთთანამშრომლობის მემორანდუმი გააფორმა ჩინეთის სახალხო რესპუბლიკის თანამშრომელთა გაცვლის საერთაშორისო ასოციაციასთან.

მემორანდუმის მიზანია ჩინურ და ქართულ მხარეებს შორის სამეცნიერო და ტექნიკური მიმართულების პერსონალის გაცვლის მხარდაჭერა, ერთობლივი პროექტების განხორციელება სოფლის მეურნეობის, მრეწველობისა და მომსახურების სფეროებში.

სოფლის მეურნეობის სამეცნიერო-კვლევითი ცენტრი ხელს შეუწყობს ჩინეთის სახალხო რესპუბლიკის თანამშრომელთა გაცვლის საერთაშორისო ასოციაციის თანამშრომლობას სხვა ორგანიზაციებთან. ჩინეთის ინსტიტუტების მოთხოვნით და სოფლის მეურნეობის სამცენიერო-კვლევითი ცენტრის რესურსებზე დაყრდნობით, ცენტრს შეუძლია რეკომენდაცია გაუწიოს გამოცდილ საერთაშორისო ექსპერტებს ჩინეთის შესაბამის ინსტიტუტებთან თანამშრომლობისთვის, უშუალოდ ცენტრიდან ან სხვა ორგანიზაციიდან ტექნოლოგიების გაცვლის მიზნით.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან