საკონსტიტუციო სასამართლომ მოსამართლე ევა გოცირიძის აცილების შესახებ „ერთიანი ნაციონალური მოძრაობის“ შუამდგომლობა უსაფუძვლობის გამო არ დააკმაყოფილა. მოთხოვნა პარტიის წარმომადგენელმა ანა წითლიძემ 13 ნოემბრის სხდომაზე, ოპოზიციური პარტიების აკრძალვის საქმის განხილვისას დააყენა.

წითლიძის განცხადებით, წინა სხდომაზე გოცირიძის შეფასებები და მოპასუხეთა პასუხებზე მისი რეაქციები მოსამართლის მიუკერძოებლობაში დასაბუთებულ ეჭვს აჩენდა. მან, სხვა განცხადებებთან ერთად, მოიყვანა გოცირიძის კითხვა: „მმართველი პარტია არ არის დამნაშავე საერთოდ?“

ლევან ბეჟაშვილმა განმარტა, რომ პრეტენზია მოსამართლის მიერ მწვავე შეკითხვის დასმის უფლებას არ ეხებოდა: „საკითხი არის ის, რომ ხომ არ გამოავლინა მოსამართლემ წინასწარ ჩამოყალიბებული დამოკიდებულება იმ სამართლებრივ საკითხზე, რომლის გადაწყვეტაც მას ჯერ კიდევ წინ აქვს“.

სასამართლოს თავმჯდომარის, რევაზ ნადარაიას განცხადებით, პლენუმმა გოცირიძის კითხვებში წინასწარ ჩამოყალიბებული პოზიციის ნიშნები ვერ დაინახა. მისი თქმით, მწვავე შეკითხვა არ ნიშნავს, რომ მოსამართლეს საქმეზე მოსაზრება უკვე ჩამოყალიბებული აქვს.

„ვერავინ ვერ მოახერხებს იმას, რომ აცილების შუამდგომლობით მოსამართლეს შეეზღუდოს ობიექტური შეკითხვის დასმა“, - თქვა ნადარაიამ.

გოცირიძემ განმარტა, რომ მისი კითხვები ეხებოდა მკვლელობებს, რომლებზეც კანონიერ ძალაში შესული განაჩენები არსებობს, ამ საქმეების გამოუძიებლობას წინა ხელისუფლების პირობებში და პრეზიდენტის მიერ იმ პირების დაჯილდოებას, რომლებიც მოგვიანებით დამნაშავეებად ცნეს. მისი თქმით, სწორედ ამ კონტექსტში იკითხა, შეიძლებოდა თუ არა დაჯილდოება დანაშაულის წახალისებად შეფასებულიყო.

ავტორი: მარიამ იმერლიშვილი, ექსპრესნიუსის რეპორტიორი 2020 წლიდან

სოციალური ქსელები

ლე პენი აცხადებს, რომ მზადაა ზელენსკის ბრიუსელში შეხვდეს

Bloomberg: პუტინმა ნატოს შემცირება აშშ-სთან უკრაინასთან დაკავშირებული მოლაპარაკებების პირობად დაასახელა.

სალომე ზურაბიშვილი - ოცნებამ პოლიტიკური ცხოვრება ამ ქვეყანაში უკვე გააუქმა

ევა გოცირიძე ნიკა გვარამიას - ირღვეოდა თუ არა 2004-2012 წლებში ადამიანის უფლებები და იყო თუ არა ამაზე პასუხისმგებელი ენმ?