ევროკავშირი არ ცნობს იმ კონსტიტუციურ და სამართლებრივ ჩარჩოებს, მათ შორის, მათ ბოლო ცვლილებებს, რომელთა საფუძველზეც რუსეთის მიერ ოკუპირებულ ცხინვალის რეგიონში 18 სექტემბერს ე.წ. საპრეზიდენტო არჩევნები ჩატარდა.

EU-ს განცხადებით, კენჭისყრის შედეგები ბათილია და მას იურიდიული ძალა არ აქვს.

ევროკავშირმა მკაცრად დაგმო მოსკოვის ქმედებები, რომლებიც ოკუპირებული ცხინვალის მარიონეტული რეჟიმის ე.წ. პრეზიდენტად რუსეთის სახელმწიფო უწყებების ყოფილი მაღალჩინოსნის, მარატ კამბოლოვის, დანიშვნას ემსახურებოდა.

EU-მ ასევე დაგმო 9 მაისს ხელმოწერილი ე.წ. ხელშეკრულება “სამოკავშირეო თანამშრომლობის გაღრმავების შესახებ” და რუსეთის მცდელობები, ოკუპირებული რეგიონი საკუთარ პოლიტიკურ, სამხედრო, ეკონომიკურ და სამართლებრივ სივრცეებში მოაქციოს.

ევროკავშირის შეფასებით, აღნიშნული ნაბიჯები ეწინააღმდეგება კონფლიქტის მშვიდობიან მოგვარებას და რუსეთის მიერ ოკუპირებული რეგიონის სამომავლო უკანონო ანექსიისკენ არის მიმართული.

განცხადებაში აღნიშნულია, რომ მსგავსი ქმედებები სისტემატურად აღრმავებს დაყოფას, საფრთხეს უქმნის რეგიონულ უსაფრთხოებასა და სტაბილურობას და უხეშად არღვევს საერთაშორისო სამართალს.

ევროკავშირმა კიდევ ერთხელ დაადასტურა საქართველოს საერთაშორისოდ აღიარებულ საზღვრებში სუვერენიტეტისა და ტერიტორიული მთლიანობისადმი ურყევი მხარდაჭერა და რუსეთს მოუწოდა, პატივი სცეს საქართველოს სუვერენიტეტს და შეწყვიტოს ქვეყნის ტერიტორიული მთლიანობის წინააღმდეგ მიმართული ყველა ქმედება.

EU-მ ასევე აღნიშნა, რომ კონფლიქტის მშვიდობიანი მოგვარების ერთგული რჩება, მათ შორის, ჟენევის საერთაშორისო დისკუსიების თანათავმჯდომარეობისა და საქართველოში ევროკავშირის სადამკვირვებლო მისიის საქმიანობის გზით.

ავტორი: მარიამ იმერლიშვილი, ექსპრესნიუსის რეპორტიორი 2020 წლიდან

სოციალური ქსელები

CNN: ტრამპმა ბოლო 12 დღის განმავლობაში განსაკუთრებით უცნაური საქციელი გამოავლინა

დაავადებათა კონტროლის ცენტრი - ბავშვების მდგომარეობა დამაკმაყოფილებელია, შემთხვევებს მნიშვნელოვანი გართულებები არ მოჰყოლია

112-ში ზარები შეფერხებით შედის - გამოქვეყნდა ალტერნატიული საკონტაქტო ნომრები

მოსკოვის აეროპორტებში 30-ზე მეტი რეისი ვერ დაეშვა