სასამართლომ საქართველოს ყოფილი გენერალური პროკურორი, ოთარ რომანოვ-ფარცხალაძე დაუსწრებლად დაპატიმრება ძალაში დატოვა.

2026-08-10 19:17:17, 1946 ნახვა

სამართალი

ბიზნესმენ ლევან ჯანგველაძის დაქირავებული და ანგარებით მკვლელობის ორგანიზებაში ბრალდებული საქართველოს ყოფილი გენერალური პროკურორის, ოთარ რომანოვ-ფარცხალაძესთვის დაუსწრებლად შეფარდებული წინასწარი პატიმრობის ბრძანება ძალაში რჩება, იუწყება IPN.

დღევანდელ სხდომაზე მოსამართლე ლელა კალიჩენკომ, დაუშვებელი მტკიცებულებების შესახებ მხარეთა შუამდგომლობების მოსმენის გარდა, განიხილა ყოფილი გენერალური პროკურორისთვის შეფარდებული წინასწარი პატიმრობის ბრძანება და ძალაში დატოვა იგი. ეს იყო ბრალდების მხარის მოთხოვნა, ხოლო დაცვის მხარემ პატიმრობის მოხსნის შუამდგომლობა შეიტანა.

სასამართლო სხდომა ხვალ, 15:00 საათზე განახლდება.

შეგახსენებთ, რომ ოთარ რომანოვ-ფარცხალაძეს ბიზნესმენ ლევან ჯანგველაძის დაქირავებული და ანგარებით მკვლელობის ორგანიზებაში ადანაშაულებენ. მას ბრალი წაუყენეს საქართველოს სისხლის სამართლის კოდექსის 25/109-ე მუხლის „ნ“ ქვეპუნქტით, რაც გულისხმობს დაქირავებული და ანგარებით განზრახ მკვლელობის ორგანიზებას. ეს დანაშაული 16-დან 20 წლამდე ან უვადო თავისუფლების აღკვეთას ითვალისწინებს.

ოთარ რომანოვ-ფარცხალაძე რუსეთის მოქალაქეა და მასზე საერთაშორისო ძებნაა გამოცხადებული.

იმავე საქმეზე კიდევ ოთხი პირი იქნა გასამართლებული: გელა უძილაური, დავით და გიორგი მიქაძეები და გიორგი ჯოხაძე; ყველას სამუდამო პატიმრობა მიესაჯა.

ძმებს, გიორგი და დავით მიქაძეებს, ასევე გიორგი ჯოხაძეს, ბრალი წაუყენეს სისხლის სამართლის კოდექსის 25/109 მუხლის „ნ“ ქვეპუნქტით, რაც გულისხმობს დაქირავებული და ანგარებით მკვლელობის ორგანიზებას. გიორგი ჯოხაძეს ასევე ბრალი წაუყენეს სისხლის სამართლის კოდექსის 236-ე მუხლის მე-6 ნაწილის „ა“ და „ბ“ ქვეპუნქტებით, რაც გულისხმობს ჯგუფურად ცეცხლსასროლი იარაღისა და საბრძოლო მასალის უკანონო შეძენას, შენახვას და გასაღებას.

გელა უძილაური დამნაშავედ ცნეს ლევან ჯანგველაძის დაქირავებული და ანგარებით განზრახ მკვლელობისა და გია ჩადუნელის მკვლელობის მცდელობისთვის.

Patreon P მხარი დაუჭირე "ექსპრესნიუსს" →

ავტორი: მარიამ იმერლიშვილი, ექსპრესნიუსის რეპორტიორი 2020 წლიდან