საერთაშორისო ორგანიზაცია „საერთაშორისო გამჭვირვალობამ“ ჟურნალისტ ნანუკა ჟორჟოლიანის საქმესთან დაკავშირებით სტრასბურგში, ადამიანის უფლებათა ევროპულ სასამართლოში (ECHR) საჩივარი შეიტანა. არასამთავრობო ორგანიზაციის ცნობით, საჩივარი ჟორჟოლიანის სამდღიან ადმინისტრაციულ პატიმრობას ეხება. „სასამართლომ, რომელსაც, ჩვენი აზრით, ივანიშვილის ერთგული მომხრეები და მოსამართლეთა კორუმპირებული კლანი აკონტროლებენ, ნანუკა ჟორჟოლიანი ადმინისტრაციულ სამართალდარღვევაში დამნაშავედ ცნო და სამდღიანი ადმინისტრაციული პატიმრობა მიუსაჯა. ეს გადაწყვეტილება პარლამენტის შენობის წინ ტროტუარზე გამართულ მშვიდობიან საპროტესტო აქციაში მის მონაწილეობას უკავშირდება.

ჩვენ მიგვაჩნია, რომ სასამართლოს გადაწყვეტილებები აშკარად ეწინააღმდეგება შეკრებისა და გამოხატვის თავისუფლების, პირადი ცხოვრების ხელშეუხებლობისა და სამართლიანი სასამართლოს უფლებებს, რომლებიც გარანტირებულია საქართველოს კონსტიტუციითა და ადამიანის უფლებათა ევროპული კონვენციით. უფრო მეტიც, ისინი ეწინააღმდეგება შინაგან საქმეთა სამინისტროს საკუთარი კამერების მიერ გადაღებულ ვიდეომასალას, რომელიც ნათლად აჩვენებს, რომ პარლამენტის წინ ტროტუარზე შეკრებილმა მომიტინგეებმა, მათ შორის ნანუკა ჟორჟოლიანმა, არავის შეუშალეს ხელი გადაადგილებაში.

ნანუკა ჟორჟოლიანის საჩივარი მეთორმეტე საჩივარია, რომელიც ჩვენმა ორგანიზაციამ მხოლოდ ბოლო ერთი წლის განმავლობაში სტრასბურგის სასამართლოში შეიტანა.

ჩვენ გავაგრძელებთ დარღვეული მოქალაქეების უფლებების დაცვას საერთაშორისო სასამართლოებში, რადგან ივანიშვილის რეჟიმის დროს ეროვნულ სასამართლოებში სამართლიანობის აღდგენა შეუძლებელი გახდა“, - ნათქვამია ორგანიზაციის განცხადებაში.

ავტორი: ელენე გვიმრაძე, ექსპრესნიუსის რეპორტიორი 2018 წლიდან

სოციალური ქსელები

კობახიძე ამტკიცებს, რომ ტრამპს და რუბიოს ესაუბრა

კაცმა ფარულად შეაღწია საცხოვრებელ სახლში, ბლაგვი საგნით და ცივი იარაღით დაზიანებები მიაყენა თანასოფლელ, ხანდაზმულ ქალს, დანაშაულის ადგილს ცეცხლი წაუკიდა და მიიმალა - ქალი ადგილზე გარდაიცვალა

პაპუაშვილი – საქართველო-აშშ-ის ურთიერთობები გადატვირთვის გზით მიდის

კობახიძე - ალდეს ლიბერალობის არაფერი ეტყობა, კვლავაც დგანან რადიკალიზმის, მათ შორის ტერორისტული აქტის მხარეს