გიგა ბოკერია: პოლიტიკური ნიშნით დევნასთან დაკავშირებით ივანიშვილის გუნდის მოთხოვნა არავინ დააკმაყოფილა

2015-02-17 17:25:55, 450 ნახვა

„პოლიტიკური ნიშნით დევნასთან დაკავშირებით ივანიშვილის გუნდის მოთხოვნა არავინ დააკმაყოფილა და რაღა მაინცდამაინც უკრაინას ეცნენ?!“, – ასე შეაფასა „ერთიანი ნაციონალური მოძრაობის“ წევრმა გიგა ბოკერიამ უკრაინის მხარის გადაწყვეტილება, სააკაშვილისა და ადეიშვილის საქართველოში ექსტრადირებაზე უარის თქმასთან დაკავშირებით.
მისივე თქმით, ქართული მხარის მიერ უკრაინისთვის მსგავსი თხოვნით მიმართვა, ამ ორ ქვეყანას შორის ურთიერთობის გაფუჭების მცდელობაა.
„ბევრჯერ ვთქვით და უნდა გავიმეორო, არ ვიცი ამას რა დავარქვა, ბოდვამდე მისული არაკომპეტენტურობა თუ რაღაც მიზანმიმართული მცდელობა, რომ უკრაინასთან საქართველოს ურთიერთობა გაუფუჭდეს. მინდა გითხრათ, არავინ არ დააკმაყოფილა ივანიშვილის გუნდის მოთხოვნა პოლიტიკური ნიშნით დევნასთან დაკავშირებით და რაღა მაინცდამაინც უკრაინას ეცნენ?!“, – აღნიშნა ბოკერიამ.
ცნობისთვის, საქართველომ უკრაინულ მხარეს მიხეილ სააკაშვილისა და ზურაბ ადეიშვილის ექსტრადირების თხოვნით მიმართა.
თუმცა, პროკურატურის ინფორმაციით, უკრაინის მხარე მიხეილ სააკაშვილისა და ზურაბ ადეიშვილის საქართველოში ექსტრადიციის საკითხზე საქართველოს გენერალურ პროკურატურასთან არ თანამშრომლობს და ძებნილი პირების ექსტრადირებაზე უარს აცხადებს.