თბილისში ოფიციალური ვიზიტის ფარგლებში ეუთოს გენერალურმა მდივანმა ფერიდუნ სინირლიოღლუმ შეხვედრა და ბრიფინგი გამართა საქართველოს საგარეო საქმეთა მინისტრთან მაკა ბოჭორიშვილთან.

სინირლიოღლუმ ქვეყანაში შიდა პოლიტიკურ კრიზისზე კომენტარისგან თავი შეიკავა და ხაზგასმით აღნიშნა, რომ ის „ერთგულად ემსახურება ორგანიზაციის ყველა წევრი სახელმწიფოს ინტერესებს“.

„ხაზგასმით მინდა აღვნიშნო, რომ ეუთო უკიდურესად დაინტერესებულია რეგიონით და მხარს უჭერს როგორც საქართველოს, ასევე სამხრეთ კავკასიის ყველა ქვეყანას“, - განაცხადა მან.

შემდეგ მან უსაფრთხოების საკითხებს შეეხო და აღნიშნა, რომ ეუთოს ინციდენტების პრევენციის მექანიზმი „ფაქტობრივად უკვე 60 წლისაა“.

„ეუთო არის ორგანიზაცია, რომელმაც დაამტკიცა, რამდენად მნიშვნელოვანია დიალოგის წარმოება, განსაკუთრებით კონფლიქტურ რეგიონებსა და სახელმწიფოებს შორის. ჩვენ გვაქვს სხვადასხვა მედიაციის ინსტრუმენტები, რომლებსაც ვიყენებთ ამ სიტუაციებში და მუდმივად ვცდილობთ ჩავერთოთ კონფლიქტების მოგვარებაში.

საქართველოში სტაბილურობა სასიცოცხლოდ მნიშვნელოვანია როგორც მისი მოქალაქეებისთვის, ასევე მთელი რეგიონის ინტერესებისთვის - მშვიდობისა და უსაფრთხოების უზრუნველყოფის თვალსაზრისით. ამ კონტექსტში ჩვენ ათწლეულების განმავლობაში ვთანამშრომლობთ საქართველოსთან. კიდევ ერთხელ მინდა ხაზგასმით აღვნიშნო: ჩვენ გვინდა ვაჩვენოთ საქართველოს, რომ მზად ვართ მივიღოთ მონაწილეობა მისი უსაფრთხოების განმტკიცებაში ჩვენი ორგანიზაციის ხელთ არსებული ყველა საშუალებით“, - განაცხადა ფერიდუნ სინირლიოღლუმ.

ავტორი: ექსპრესნიუსი,

სოციალური ქსელები

გერმანიის ელჩი - ქართველები რუსული შეჭრის ტკივილს ღრმად იცნობენ, მაშინ როდესაც მათი ტერიტორიის 20% ოკუპირებულია

დუბაის პრინცმა ინდოელი flydubai-ს პილოტი, კაპიტანი სმიტ მაჩჰარი საავადმყოფოში მოინახულა

კირცხალია პატიმრის გაუპატიურებაზე - უტევენ იმას, სადაც არის რეალურად ჯანსაღი სიტუაცია, სადაც არის მაღალი სტანდარტები

მოვუწოდებთ ევროკავშირს, მიზანმიმართული სანქციები დაუწესოს იმ პირებს, რომლებიც საქართველოში რეპრესიებსა და დემოკრატიისთვის ძირის გამოთხრაზე არიან პასუხისმგებელი - ALDE Party