გამოცემა Byline Times გაჟონილ დოკუმენტებზე დაყრდნობით წერს, რომ TV იმედის მფლობელის, ირაკლი რუხაძის, კომპანია Hunnewell Partners რუსული ტელეკომუნიკაციების კომპანია MTS-ის წინააღმდეგ შეტანილ სარჩელში პუტინთან დაახლოებული რუსი ოლიგარქის, რომან აბრამოვიჩის ფირმის ინტერესებს წარმოადგენდა.

Byline Times საკუთარ გამოძიებაზე დაყრდნობით ასკვნის, რომ რუხაძის კომპანიის დახმარებით აბრამოვიჩის ფირმამ შეძლო, MTS-ს კორუფციის სკანდალის შედეგად დაკარგული თანხის ანაზღაურებასთან დაკავშირებით აშშ-ში სარჩელი საკუთარი თავის მოსარჩელედ დასახელების გარეშე შეეტანა.

გამოცემა ასევე აღნიშნავს, რომ Hunnewell-ის სარჩელი MTS-ის თავდაპირველ საჩივართან დაკავშირებით 2022 წლის აპრილამდე გაგრძელდა, მანამდე, დაახლოებით ექვსი კვირით ადრე, კი აბრამოვიჩს გაერთიანებულმა სამეფომ უკრაინაში რუსეთის შეჭრის ფონზე სანქციები დაუწესა. 

ამის შესახებ Byline Times კვიპროსში დაფუძნებული ოფშორული კორპორაციული სერვისის პროვაიდერის, MeritServus-ის გაჟონილ დოკუმენტებზე დაყრდნობით წერს.

"ეს არის სიტუაცია, როდესაც გაერთიანებული სამეფოს ბიზნესი პუტინთან კავშირებისა და უკრაინაში რუსეთის ომისთვის სტრატეგიულად მნიშვნელოვანი საწარმოების გამო სანქცირებულ პირს შესაძლოა სასამართლოში ფულის მოგებაში დახმარებოდა". - თქვა Transparency International UK-ის კვლევებისა და გამოძიებების ხელმძღვანელმა გამოცემასთან საუბრისას. 

Hunnewell Partners-ის მიერ შეტანილი სარჩელი MTS-სა და უზბეკეთის ყოფილი პრეზიდენტის შვილს, გულნარა კარიმოვს შორის კორუფციულ გარიგებებს ეხება, რომელთა გასაჯაროების შედეგადაც ტელეკომუნიკაციების კომპანიის აქციონერებმა დიდი თანხა დაკარგეს.

რუსულ კომპანიას ბრალად ედებოდა, რომ უზბეკეთის ბაზარზე შესვლის ნებართვის ასაღებად კარიმოვას დიდი ოდენობით ქრთამი გადაუხადა.

MTS-ს, როგორც ღია აქციების კომპანიას, რომელიც ნიუ იორკის საფონდო ბირჟაზე არის რეგისტრირებული, აშშ-ში მის წინააღმდეგ საქმის აღძვრა ემუქრებოდა, თუმცა 2019 წლის მარტში კომპანიამ ხელისუფლებასთან გარიგება დადო, ბრალდებები აღიარა და ჯარიმის სახით 850 მილიონი დოლარი გადაიხადა. ამას კომპანიის აქციის ფასის ვარდნა მოჰყვა, უკმაყოფილო აქციონერებმა ქონების დაკარგვის გამო აშშ-ში MTS-ს უჩივლეს, მთავარ მოსარჩელედ კი Hunnewell Partners დაინიშნა, რომელმაც, საქმის საბუთების თანახმად, ყველაზე დიდი, 13 მილიონი დოლარის ღირებულების ზარალი მიიღო.

სასამართლომ სარჩელი არ დააკმაყოფილა, თუმცა, როგორც გამოცემა აღნიშნავს, იმ დროისთვის არავინ დაეჭვებულა, რომ MTS-ის აქციები Hunnewell Partners-ს სინამდვილეში არ ეკუთვნოდა. Byline Times-ის თანახმად, გაჟონილ დოკუმენტებში ჩანს, რომ 2019 წელს Hunnewell Partners-მა კვიპროსში დაფუძნებულ Pro-Alpha Investments Ltd.-სთან ხელშეკრულება დადო - რუხაძის კომპანია ნომინალურ "უფლებებს, ქონებრივ უფლებას, კუთვნილებასა და ინტერესს" მიიღებდა MTS-ს ფასიან ქაღალდებზე, რომლებსაც 2018 წლის ნოემბრამდე სინამდვილეში Pro Alpha ფლობდა, შემდგომ კი ასევე კვიპროსში დაფუძნებულ ფირმას, Pro-Beta Investments Ltd.-ს გადაეცა. 

გამოცემის მიხედვით, ხელშეკრულება ითვალისწინებდა, რომ Hunnewell Partners "ფასიანი ქაღალდების შესახებ აშშ-ს ფედერალური კანონების დარღვევაზე ნებისმიერ და ყველა სარჩელში, პრეტენზიასა და სარჩელის წარდგენის საფუძველში" Pro-Alpha-ს "ჭეშმარიტ და კანონიერ რწმუნებულად" იმოქმედებდა.

Byline Times წერს, რომ Pro-Alpha-სა და Pro-Beta-ს მიღმა, სულ მცირე, ექვსი იურიდიული პირი იდგა, ხოლო საბოლოოდ ყველა ეს ერთეული ოლიგარქ აბრამოვიჩს უკავშირდებოდა.

ამ ხელშეკრულებით Pro Alpha Investments Ltd.-ს შეეძლო, რომ საკუთარი თავის მოსარჩელედ ოფიციალურად დასახელების გარეშე MTS-ის წინააღმდეგ სარჩელი წარედგინა და დაკარგული თანხა აენაზღაურებინა. მოსარჩელე Hunnewell Partners იქნებოდა, როგორც Pro Alpha-ს რწმუნებული, სანაცვლოდ კი რუხაძის კომპანია მოგებული თანხის 10%-ს მიიღებდა. 

Hunnewell-ის წარმომადგენელმა გამოცემასთან საუბრისას MTS-ს წინააღმდეგ აღძრული სარჩელი "სრულად ნორმალურად" დაახასიათა და თქვა, რომ კომპანიებს შორის "სასამართლო საქმის დაფინანსების ჩვეულებრივი გარიგება" დაიდო. Byline Times-ის თანახმად, რუხაძის ფირმის წარმომადგენელმა ასევე უარყო, რომ კომპანიას აბრამოვიჩთან შეთანხმებები ჰქონდა დადებული, აღნიშნა, რომ გარიგების დადების დროისთვის აბრამოვიჩი გაერთიანებული სამეფოს მიერ სანქცირებული არ ყოფილა და განაცხადა, რომ მათთვის "არ იყო ცნობილი სარჩელში მისი ჩართულობის შესახებ (თუ ეს მართალია)". 

"Hunnwell Partners-ს რუსეთში ბიზნესის გარიგებები ან ინვესტიციები არც პირდაპირ და არც ირიბად არ აქვს. რომან აბრამოვიჩთან არანაირი კავშირი არ გვაქვს და დანაშაულის ჩადენის ნებისმიერ მინიშნებას კატეგორიულად უარვყოფთ. [ჩვენ] არაორაზროვნად პროევროპელები და პროუკრაინელები ვართ. კიევში რამდენიმე წლის განმავლობაში ოფისი და თანამშრომლები გვყავდა და იქ ახლო მეგობრები და კოლეგები კვლავ გვყავს". - თქვა ფირმის წარმომადგენელმა Byline Times-თან საუბრისას.

გამოცემა ასევე წერს, რომ რომან აბრამოვიჩთან Hunnewell-ის კავშირებზე Salford-ის საქმის საბუთებიც მეტყველებს. Byline Times-ის თანახმად, რუხაძემ პატარკაციშვილის ოჯახისთვის აბრამოვიჩის მხრიდან 300 მილიონი დოლარის გადაცემაში "საკვანძო" როლი შეასრულა. გამოცემა ასევე აღნიშნავს, რომ 2017 წლისთვის Hunnewell Partners აბრამოვიჩის მფლობელობაში მყოფი ოფშორული კომპანიისგან, Tri Star Capital Ventures-ისგან სხვა სასამართლო საქმისთვის დაფინანსებას იღებდა. 

Byline Times ასევე ხაზს უსვამს, რომ Hunnewell Partners-ის მფლობელობაში მყოფი TV იმედი ივანიშვილის რეჟიმის პროპაგანდას ავრცელებს და სამთავრობო პრორუსულ რიტორიკას აძლიერებს:

უკრაინაში ომის დაწყებიდან ასევე მიიჩნევა, რომ ივანიშვილის მთავრობა  სწორედ მისი ბრძანებით ეშვება ძალადობრივად ავტორიტარიზმში და თავს შორს იჭერს დიდი ხნის საერთაშორისო პარტნიორებთან, რათა ერთხელ პროდასავლურ ყოფილ საბჭოთა რესპუბლიკას კვლავ მოსკოვის ორბიტისკენ შეუცვალოს მიმართულება. [...]

მომიტინგეები, რომელთაგან მრავალს საქართველოს რუსეთთან 2008 წლის ომის მწარე მოგონებები აქვს, შემაძრწუნებელ ამბებს ჰყვებიან ივანიშვილის უსაფრთხოების სამსახურების ხელთ სასტიკი მოპყრობის, წამების შესახებაც კი. ოპოზიციონერი პოლიტიკოსები, სამოქალაქო აქტივისტები და ჟურნალისტები დაკავებისა და დევნის სამიზნეები ხშირად ხდებიან, მათგან მრავალს სდებენ ბრალს დანაშაულებში, რომლებიც მრავალწლიან პატიმრობას ითვალისწინებს. 

ამ დარღვევების ფონზე, კრიტიკოსები რეგულარულად ადანაშაულებენ Hunnewell-ს საქართველოს უმსხვილესი სატელევიზიო ქსელის სახელმწიფო პროპაგანდის გასაძლიერებლად გამოყენებისთვის, არა მხოლოდ "ქართული ოცნების" მასობრივად არაპოპულარული პრორუსული რიტორიკისა და ტრაექტორიის გამართლებისთვის, არამედ ასევე პოლიტიკური ოპონენტების წინააღმდეგ თავდასხმების, მშვიდობიან მომიტინგეებზე ძალადობის გამართლებისთვისაც კი.

მანამდე, ივანიშვილის რეჟიმის მხარდამჭერი პროპაგანდის გავრცელების გამო გაერთიანებული სამეფოს პარლამენტის თემთა პალატაში დეპუტატმა ბლერ მაკდუგალმა TV იმედის მფლობელი კომპანიის, Hunnewell Partners-ის წინააღმდეგ ბრიტანეთში გამოძიების დაწყების განხილვის საკითხი წარადგინა. 

ავტორი: ექსპრესნიუსი,

სოციალური ქსელები

რუსებმა კრივოი როგზე სარაკეტო იერიში მიიტანეს - დაღუპულია 12 ადამიანი

მიხეილ სააკაშვილი - ოლიგარქის ღალატის კომისიას ორი უმთავრესი ფუნქცია აქვს

ანა დოლიძე - საჩივარი შეტანილია, ბრძოლა გრძელდება!

პროტესტის 128-ე დღეს რუსთაველის გამზირი კვლავ გადაიკეტა