ლევან მახაშვილი - დღევანდელი აქცია რადიკალური პოლიტიკური ჯგუფების კიდევ ერთი მცდელობაა, თავი დაიტოვონ პოლიტიკურ სივრცეში

2025-03-31 13:50:40, 482 ნახვა

პოლიტიკა

დღევანდელი აქცია ამ რადიკალური პოლიტიკური ჯგუფების კიდევ ერთი სურვილი თუ მცდელობაა, რომ თავი დაიტოვონ ქართულ პოლიტიკურ სივრცეში და საერთოდ არ გაქრნენ - რაოდენ ცინიკურია, რომ ეს პროცესი მათ საქართველოს იმ ისტორიულ მოვლენებს დაამთხვიეს, რასაც საქართველოში პირველი რეფერენდუმი ჰქვია, - ამის შესახებ პარლამენტის ევროპასთან ინტეგრაციის კომიტეტის თავმჯდომარემ, ლევან მახაშვილმა ჟურნალისტებთან რუსთაველის გამზირზე დღეს დაგეგმილ აქციასთან დაკავშირებით განაცხადა.

მისი შეფასებით, დღეს ოპოზიცია კიდევ ერთხელ შეეცდება, რომ „თავი გაიცოცხლოს“.

„დღევანდელი აქცია ამ რადიკალური პოლიტიკური ჯგუფების კიდევ ერთი სურვილი თუ მცდელობაა, რომ თავი დაიტოვონ ქართულ პოლიტიკურ სივრცეში და საერთოდ არ გაქრნენ. ბოლოს საზოგადოებაც კარგად ხედავს, თუკი ეს ძალები სადმე არიან წარმოდგენილი, არიან არა საკუთარ მოქალაქეებთან, არამედ დადიან დედაქალაქ-დედაქალაქ და კვლავ გარედან შიგნით პოლიტიკური დღის წესრიგის შექმნას ცდილობენ, რადგან შიგნით პოზიტიური დღის წესრიგის შეთავაზების ან მოსახლეობის პრობლემების გადაჭრის გზების შეთავაზების არანაირი რესურსი არ გააჩნიათ. დღეს კიდევ ერთხელ შეეცდებიან ამ პროცესის დაწყებას, რომ რაღაცნაირად თავი გაიცოცხლონ. რაოდენ ცინიკურია, რომ ეს პროცესი მათ საქართველოს იმ ისტორიულ მოვლენებს დაამთხვიეს, რასაც საქართველოში პირველი რეფერენდუმი ჰქვია, რომელსაც შემდეგ დამოუკიდებლობის აღდგენა დაეფუძნა. ეს არის და ეს, მაგრამ ჩვენ ვხედავთ საზოგადოების განწყობებს, ვაკვირდებით ამას და ვმუშაობთ საზოგადოებასთან. საზოგადოებას აინტერესებს არა ეს პოლიტიკური რადიკალიზმი, არამედ აინტერესებს კონკრეტული გადაწყვეტილებები, ნაბიჯები და ინიციატივები, თუ როგორ შეიძლება, მათი ცხოვრება უკეთესი იყო მომავალში“, - განაცხადა მახაშვილმა.

ცნობისთვის, დღეს თბილისში საპროტესტო აქცია და რამდენიმე მარში გაიმართება. აქცია ლოზუნგით: „დგება ხალხის გაზაფხული“ რუსთაველის გამზირზე არის დაგეგმილი.

როგორც ცნობილია, 21:00 საათზე საზოგადოებას სიტყვით მიმართავს საქართველოს მეხუთე პრეზიდენტი - სალომე ზურაბიშვილი.

ავტორი: ექსპრესნიუსი,