თბილისის მერმა და საკრებულოს წევრებმა ალილოს მონაწილეებს საჩუქრები გადასცეს

2015-01-07 15:23:44, 335 ნახვა

თბილისის მერმა დავით ნარმანიამ და საკრებულოს წევრებმა საშობაო მსვლელობის მონაწილეებს ტკბილეულობა და სხვა საჭირო ნივთები გადასცეს.
როგორც დავით ნარმანიამ ჟურნალისტებთან საუბარში განაცხადა, ალილოს ის, თბილისის მერის რანგში პირველად ხვდება და ამით მოხარულია.
„მოხარული ვარ, რომ წელს ალილოს თბილისის მერის რანგში პირველად ვხვდები. მინდა მთელ საქართველოს ქრისტესშობის დღესასწაული მივულოცო და სიკეთე და ჯანმრთელობა ვუსურვო“, – აღნიშნა ნარმანიამ.
შობის დღესასწაული საქართველოს მოსახლეობას საკრებულოს თავჯდომარე გიორგი ალიბეგაშვილმაც მიულოცა.
„ალილო, ეს უძველესი ტრადიციაა, რომელიც დღემდე მოვიდა და რომელიც უნდა შევინარჩუნოთ. მინდა მთელ საქართველოს მოსახლეობას მივულოცო ეს ბრწყინვალე დღესასწაული და ვუსურვო ყოველივე კარგი“, – განაცხადა ალიბეგაშვილმა.
ამ დროისთვის საშობაო მსვლელობის მონაწილეთა ნაწილი საპატრიარქოსკენ მიემართება, ნაწილი კი, პრეზიდენტის რეზიდენციისკენ.