„ქართული ოცნების“ ძალისხმევით ქვეყანა სრულად იზოლირებულია ცივილიზებული სამყაროსგან. ცრუ დევიზის - „ღირსებით ევროპისკენ“ ნაცვლად, „ქართულმა ოცნებამ“ დააყენა რეალობა - „კუდამოძუებული ევროპიდან“, - ამის შესახებ „ძლიერი საქართველო“ ერთ-ერთმა ლიდერმა, ბადრი ჯაფარიძემ ბრიფინგზე განაცხადა.

მისი განმარტებით, ევროპის საბჭოს საპარლამენტო ასამბლეის მიერ მიღებული რეზოლუციის თანახმად, „ქართული ოცნების“ დელეგაციას უფლებამოსილება შეეზღუდა და განისაზღვრა ის აუცილებელი პირობები, რომელიც ქვეყანაში უნდა განხორციელდეს.

„გუშინ საღამოს სტრასბურგში ევროპის საბჭოს ასამბლეის მიერ მიღებული იქნა უმნიშვნელოვანესი და ისტორიული გადაწყვეტილება. ამ უმნიშვნელოვანესი ევროპული ორგანოს საპარლამენტო ასამბლეამ სრულად დაუჭირა მხარი ქართველი ხალხის ბრძოლას სამართლიანობისთვის, ევროპული მომავლისთვის და საქართველოში კანონის უზენაესობის დამკვიდრებისთვის. საპარლამენტო ასამბლეამ მიიღო რეზოლუცია, რომლის თანახმადაც, „ქართული ოცნების“ დელეგაციას უფლებამოსილება შეეზღუდა და განისაზღვრა ის აუცილებელი პირობები, რომელიც უნდა განხორციელდეს ქვეყანაში“, - განაცხადა ბადრი ჯაფარიძემ.

როგორც ჯაფარიძემ აღნიშნა, მიღებულ რეზოლუციას აქვს უდიდესი მნიშვნელობა იმის ხაზგასასმელად, რომ მთელი ცივილიზებული სამყარო მხარს უჭერს ქართველი ხალხის ბრძოლას.

„ეს რეზოლუცია ერთხმად იქნა მიღებული და იმის ნაცვლად, რომ „ქართულ ოცნებას“ გაეთვალისწინებინა ეს გადაწყვეტილება, „ქართული ოცნების“ დელეგაციამ განაცხადა, რომ საპარლამენტო ასამბლეის მუშაობაში მონაწილეობას არ მიიღებს. ეს არის ზუსტად ის რეალობა, რომელიც დგას ჩვენი ქვეყნის წინაშე, როდესაც „ქართული ოცნების“ ძალისხმევით ქვეყანა სრულად იზოლირებულია ცივილიზებული სამყაროსგან. ცრუ დევიზის - „ღირსებით ევროპისკენ“ ნაცვლად, „ქართულმა ოცნებამ“ დააყენა რეალობა - „კუდამოძუებული ევროპიდან“. ეს არის ის რეალობა, რომელიც „ქართულმა ოცნებამ“ თავისი ძალადობრივი პოლიტიკური ნაბიჯებიდან გამომდინარე დააყენა. ამავდროულად, ქართველი ხალხი მიიღებს იმ აუცილებელ მხარდაჭერას ყველა ცივილიზებული ქვეყნიდან, რომელიც უზრუნველყოფს ქართველი ხალხის ბრძოლის წარმატებით დასრულებას. ეს წარმატება სჭირდება საზოგადოების გამთლიანებას, მშვიდობის დამყარებას და ჩვენი ქვეყნის ნორმალურ განვითარებას. სწორედ ამისთვის მიიღეს ის მნიშვნელოვანი რეზოლუცია, რომელსაც ერთხმად დაუჭირა მხარი ევროსაბჭოს საპარლამენტო ასამბლეამ“, - აღნიშნა ბადრი ჯაფარიძემ.

ცნობისთვის, ევროპის საბჭოს საპარლამენტო ასამბლეა საქართველოს მომდევნო თვეებში ახალი არჩევნების ჩატარებისკენ, პოლიტპატიმრების გათავისუფლებისა და ევროინტეგრაციის გზის გაგრძელებისკენ მოუწოდებს.

134 დეპუტატიდან რეზოლუციას 114-მა დაუჭირა მხარი, 13 წინააღმდეგ წავიდა, ხოლო 7-მა თავი შეიკავა.

აღნიშნული რეზოლუციის მიღების შემდეგ „ქართულმა ოცნებამ“ განაცხადა, რომ ევროპის საბჭოს საპარლამენტო ასამბლეაში მუშაობას წყვეტს.

როგორც თეა წულუკიანმა გადაწყვეტილების გაჟღერებისას განმარტა, დოკუმენტის „არაერთი დათქმა მიუღებელია, რადგან უსამართლო და საფუძველს მოკლებულია“.

ავტორი: ექსპრესნიუსი,

სოციალური ქსელები

თვითმფრინავის ჩამოვარდნა ვაშინგტონზე: რა არის ცნობილი

ტრამპი ვაშინგტონში თვითმფრინავის ჩამოვარდნაზე: ეს ჩვენი ქვეყნის ტკივილის საათია

ბადრი ჯაფარიძემ - ჩვენი მარშის მიზანია, გადავარჩინოთ მზია ამაღლობელის სიცოცხლე

მთავრობამ არა მხოლოდ არჩევნები, არამედ ევროკავშირის მომავალი მოპარა ქართველ ხალხს - გაბრელიუს ლანდსბერგისი