მარგიშვილი - EQAR- ის გადაწყვეტილებას არანაირი გავლენა არ აქვს დიპლომების აღიარებისა და კვალიფიკაციების აღიარების საკითხებთან

2024-12-21 14:51:17, 360 ნახვა

EQAR- ის გადაწყვეტილებას არანაირი გავლენა არ აქვს დიპლომების აღიარებისა და კვალიფიკაციების აღიარების საკითხებთან,- ამის შესახებ „განათლების ხარისხის განვითარების ეროვნული ცენტრის“ დირექტორის მოვალეობის შემსრულებელმა ლაშა მარგიშვილმა პრესკონფერენციაზე განაცხადა.

მარგიშილის თქმით, აღსანიშნავია, რომ როგორც 2019 წლამდე საქართველოში გაცემული დიპლომები იყო აღიარებული საერთაშორისო დონეზე ევროკავშირის წევრ სახელმწიფოებში, ასევე ნებისმიერ სხვა სახელმწიფოში, ქართული დიპლომები ისევე იქნება აღიარებული.

„უმაღლესი განათლების ხარისხის უზრუნველყოფის ევროპულ რეესტრში (EQAR) „საქართველოს განათლების ხარისხის განვითარების ეროვნული ცენტრისთვის“ რეგისტრაციის გაუქმებასთან დაკავშირებით, ცენტრი აცხადებს, რომ აღნიშნული გადაწყვეტილება არანაირი ფორმით არ უკავშირდება საქართველოში გაცემული დიპლომებისა და მინიჭებული კვალიფიკაციების აღიარების საკითხს.

აღსანიშნავია, რომ როგორც 2019 წლამდე საქართველოში გაცემული დიპლომები იყო აღიარებული საერთაშორისო დონეზე ევროკავშირის წევრ სახელმწიფოებში, ასევე ნებისმიერ სხვა სახელმწიფოში, ქართული დიპლომები ისევე იქნება აღიარებული.

ასევე გავრცელებული ინფორმაცია, თითქოს EQAR-ის მიერ მიღებული გადაწყვეტილება რაიმე ფორმით უკავშირდება საერთაშორისო ერთობლივი და გაცვლითი პროგრამების გაუქმებას, ბოლონიის პროცესში საქართველოს წევრობის შეჩერებას, კერძო უნივერსიტეტების გაუქმებას ან საერთაშორისო გრანტების შეჩერებას ან გაუქმებას, არც აღნიშნული ინფორმაცია არ შეესაბამება სიმართლეს და არანაირად არ უკავშირდება ცენტრისთვის EQAR- ის რეგისტრაციის შეჩერებას.

რაც შეეხება ხარისხის უზრუნველყოფის ევროპული ასოციაციის - ENQA-ს წევრობას, გიდასტურებთ, რომ 21 დეკემბრის მდგომარეობით, ჩვენ ვართ ENQA-ს სრული წევრი ორგანიზაცია და ENQA-ს პროცედურების მიხედვით, თუკი მათი წევრი ორგანიზაცია რომელიმე სტანდარტს ვერ აკმაყოფილებს, ისინი არ უწყვიტავენ ამ ორგანიზაციას ასოციაციის წევრობას, მას აძლევენ დამატებით ორ წლიან ვადას რომ გამოასწოროს რეკომენდაციები და შესაბამისად გააგრძელოს ასოციაციის სრული წევრობა“ - ნათქვამია ცენტრის განცხადებაში.
ასევე, რაც შეეხება განათლების ხარისხის განვითარების ეროვნული ცენტრის მიერ სამედიცინო განათლების მსოფლიო ფედერაციის (WFME) წევრობის საკითხს, აქაც გვინდა დავამშვიდოთ საზოგადოება და განვმარტოთ, ცენტრი 2018 წლიდან არის WFME-ის წევრი ორგანიზაცია და შესაბამისად ჩვენ მანამდე მოვიპოვეთ ამ ორგანიზაციის წევრობა ვიდრე გავხდებოდით ENQA-ს და EQAR-ის წევრი სააგენტო. ამასთან, WFME-ის წევრი ხარისხის უზრუნველყოფის სააგენტოების დიდი ნაწილი არ წარმოადგენს არც ENQA-ს წევრს და არც EQAR-ში რეგისტრირებულ ორგანიზაციას. აქედან გამომდინარემ არც სამედიცინო მიმართულებით არ შეიძლება ვთქვათ, რომ რაიმე ტიპის პრობლემა და დაბრკოლება შეიძლება შეექმნას ჩვენს ადგილობრივ თუ საერთაშორისო სტუდენტებს, რომლებიც სწავლობენ მედიცინის საგანმანათლებლო პროგრამებზე“,- განაცხადა მარგიშვილმა.

შეგახსენებთ, გუშინ, 20 დეკემბერს ცნობილი გახდა, რომ განათლების ხარისხის განვითარების ეროვნული ცენტრს, უმაღლესი განათლების ხარისხის განვითარების დამოუკიდებელი სააგენტოების ევროპულმა რეესტრმა (EQAR), 2023 წელს არსებული ხარვეზის საფუძველზე, რეგისტრაცია შეუჩერდა.

Patreon P მხარი დაუჭირე "ექსპრესნიუსს" →

ავტორი: ექსპრესნიუსი,