2024-03-08 13:41:33, 833 ნახვა

---

8 მარტთან დაკავშირებით, არასამთავრობო ორგანიზაციებისა და სამოქალაქო აქტივისტების ჩართულობით, კამპანია „არა ნიშნავს არას“ იგეგმება

ქალთა უფლებების დაცვის საერთაშორისო დღესთან (8 მარტი) დაკავშირებით, არასამთავრობო ორგანიზაციებისა და სამოქალაქო აქტივისტების ჩართულობით, კამპანია "არა ნიშნავს არას" იგეგმება. 

კამპანიის ფარგლებში დაგეგმილია შემდეგი აქტივობების განხორციელება:  

• საინფორმაციო პოსტერების სერია ინფორმირებული თანხმობის, სტამბოლის კონვენციის, სქესობრივ დანაშაულებთან დაკავშირებით არსებული საერთაშორისო პრაქტიკის, სხეულებრივი ავტონომიის და სხვა საკითხების შესახებ;
• ონალიან შეხვედრების სერია, ინფორმირებული თანხმობის და სქესობრივ დანაშაულებთან თანაკვეთაში მყოფი სხვა საკითხების შესახებ;
• საინფორმაციო სტატია ინფორმირებული თანხმობის შესახებ.

საინფორმაციო კამპანია დაგეგმილია ფემინისტური საინიციატივო ჯგუფის მიერ: საქართველოს შემეცნებითი ცენტრი, ფემინა, ახალგაზრდა ფემინისტები, ნაამბობი, კომლი, ფუსფუსი და  ლესბოსური წინააღმდეგობა.

ამჟამად საქართველოს სისხლის სამართლის კოდექსი გაუპატიურებას განსაზღვრავს ისე, რომ მასში უგულებელყოფილია თანხმობის არარსებობის საკითხი. ქართლი კანონმდებლობა გაუპატიურებას ცნობს მხოლოდ ძალადობის, ძალადობის მუქარის ან დაზარალებულის უმწეობის გამოყენების შემთხვევაში რის შედეგადაც კანონი დაუსჯელს ტოვებს სექსუალური სახის უამრავ დანაშაულს, რომელიც საერთაშორისო სტანდარტების თანახმად, უნდა იყოს დასჯადი.

სექსუალურ ძალადობაში დამნაშავეები საქართველოში ისჯებიან მხოლოდ მაშინ თუ მოძალადემ გამოიყენა ფიზიკური ძალა, რის შედეგადაც მსხვერპლმა მიიღო ფიზიკური დაზიანებები. ფიზიკური დაზიანებების არ არსებობის შემთხვევაში კანონი არ გვაძლევს საფუძველს ვიდავოთ გაუპატიურების მუხლით, რადგან მასში არ  არის გათვალისწინებული თანხმობის კომპონენტი.

საინფორმაციო კამპანია 8 მარტს გაიხსნება და 30 მარტს დასრულდება. თითოეული ღონისძიების შესახებ ინფორმაცია ფემინისტური საინიციატივო ჯგუფის წევრების სოციალური მედიის არხებში განთავსდება.

---

ავტორი: NS (სტატია დაფინანსებულია),

---

დღის თემა

მთავარი თემა

ინტერვიუ - ექსკლუზივი