ევროკავშირის დაფინანსებით მიმდინარე პროექტის „მწვანე გურია - ადგილობრივი დემოკრატიისა და სოფლის განვითარების მხარდაჭერა ინკლუზიური და მდგრადი მწვანე ზრდისთვის“ დაინტერესებულ მხარეთა მრჩეველთა საბჭოს პირველი შეხვედრა გაიმართა. ამის შესახებ ინფორმაციას გარემოს დაცვისა და სოფლის მეურნეობის სამინისტრო ავრცელებს.

უწყების ცნობით, ღონისძიება სოფლის მეურნეობის მინისტრის მოადგილემ, თენგიზ ნასარიძემ, კავკასიის გარემოსდაცვითი არასამთავრობო ორგანიზაციების ქსელის (CENN) აღმასრულებელმა დირექტორმა, ლოღან ჯორჯ ეტიენ ნიკოლიმ და საქართველოში ევროკავშირის წარმომადგენლობის საგანგებო სიტუაციების მართვის, სამოქალაქო დაცვის, სოფლის განვითარების და ინტელექტუალური საკუთრების პროგრამის მენეჯერმა, ქეთევან ხუციშვილმა გახსნეს.

შეხვედრის მონაწილეებმა პროექტის მიმდინარეობაზე იმსჯელეს და მისი ეფექტიანი განხორციელებისთვის რეკომენდაციები გააზიარეს. 

გარემოს დაცვისა და სოფლის მეურნეობის მინისტრის მოადგილემ პროექტში ჩართულ მხარეებს მხარდაჭერისთვის მადლობა გადაუხადა და სოფლის განვითარებაში საერთაშორისო პარტნიორების როლის მნიშვნელობაზე გაამახვილა ყურადღება.

„საქართველოს მთავრობისთვის სოფლის განვითარება ერთ-ერთი პრიორიტეტია. ევროპასთან დაახლოებისა და მათი საუკეთესო პრაქტიკის დანერგვის მიზნით, ჩვენ არაერთ მნიშვნელოვან აქტივობას ვახორციელებთ. სოფელი, უნდა იყოს კიდევ უფრო წარმატებული როგორც მეწარმეობის, ასევე სოციალურ-კულტურული განვითარების თვალსაზრისით. სწორედ ამისთვის, სახელმწიფო არაერთ მხარდამჭერ პროექტს ახორციელებს, მათ შორისაა „თემზე დაფუძნებული ადგილობრივი მხარდაჭერის პროგრამა“, რომელიც ხელს შეუწყობს სოფლის ინკლუზიურ განვითარებას“,- განაცხადა თენგიზ ნასარიძემ.

სიტყვით გამოსვლისას CENN-ის აღმასრულებელმა დირექტორმა, ლოღან ჯორჯ ეტიენ ნიკოლიმ საქართველოში ადგილობრივი სამოქალაქო საზოგადოების გაძლიერების, კონკურენტუნარიანი სოფლის მეურნეობისა და გარემოსდაცვითი პრაქტიკის დანერგვაში პროექტის  მნიშვნელობაზე გაამახვილა ყურადღება. 

როგორც საქართველოში ევროკავშირის წარმომადგენლობის საგანგებო სიტუაციების მართვის, სამოქალაქო დაცვის, სოფლის განვითარების და ინტელექტუალური საკუთრების პროგრამის მენეჯერმა, ქეთევან ხუციშვილმა აღნიშნა,  ევროკავშირი გააგრძელებს საქართველოს მხარდაჭერას იდენტიფიცირებული სტრატეგიული საჭიროებების განხორციელებისთვის როგორც სოფლის მეურნეობის, ისე გარემოს დაცვის მიმართულებებით.

შეხვედრის ფარგლებში, ოზურგეთის ჩოხატაურის ლანჩხუთისა და გურჯაანის ადგილობრივი განვითარების ჯგუფების (LAG) თავმჯდომარეების მონაწილეობით გაიმართა პანელური  დისკუსია „LAG-ები სოფლის განვითარებისთვის - შესაძლებლობები და გამოწვევები“. 

ღონისძიებას, ევროკავშირის, საქართველოს გარემოს დაცვისა და სოფლის მეურნეობის  და ეკონომიკისა და მდგრადი განვითარების სამინისტროების, გურიის რეგიონის ადგილობრივი თვითმმართველობისა და სამოქალაქო საზოგადოების წარმომადგენლები ესწრებოდნენ.

პროექტს, ევროკავშირის სოფლისა და სოფლის მეურნეობის განვითარების ევროპის სამეზობლო პროგრამის (ENPARD IV) ფარგლებში, ახორციელებს CENN-ი პარტნიორ ორგანიზაციებთან, ახალგაზრდა პედაგოგთა კავშირთან, დემოკრატიის ინსტიტუტისა და ქედის ადგილობრივი განვითარების ჯგუფთან (LAG) თანამშრომლობით. პროექტის მიზანია, სიღარიბის შემცირება და მოწყვლადი თემებისთვის ეკონომიკური და სოციალური გარემოსა და საცხოვრებელი პირობების გაუმჯობესება სამოქალაქო ჩართულობის, სოფლის ინკლუზიური განვითარებისა და მწვანე ზრდის მხარდაჭერის გზით.

ავტორი: NS (სტატია დაფინანსებულია),

სოციალური ქსელები

ეგვიპტემ ისრაელი ჰამასის 2023 წელს მოსალოდნელი თავდასხმის შესახებ გააფრთხილა

ევროკავშირი ბლოკში გაწევრიანების გზების რუკებს ამზადებს უკრაინის, მოლდოვას, მონტენეგროსა და ალბანეთისთვის

ტრამპის თქმით, ზელენსკი დათანხმდა რუსეთის ნავთობგადამამუშავებელ ქარხნებზე თავდასხმების შემსუბუქებას

The Sunday Times: რუსეთმა ურალში მდებარე თავისი საიდუმლო „მკვდარი ხელის“ კომპლექსი მოდერნიზება მოახდინა