2023-04-06 15:43:19, 861 ნახვა

---

იუსტიციის უმაღლესი საბჭოს თავმჯდომარე სანქციებზე - იმედია, წარმოდგენილი იქნება ან შესაბამისი მტკიცებულებები ან საკითხი გადაიხედება

ძალიან დიდ იმედს ვიტოვებ, რომ წარმოდგენილი იქნება ან შესაბამისი მტკიცებულებები ან საკითხი გადაიხედება, - ამის შესახებ იუსტიციის უმაღლესი საბჭოს თავმჯდომარემ, ნინო ქადაგიძემ აშშ-ის მიერ ოთხი მოსამართლისთვის სანქციების დაწესებასთან დაკავშირებით განაცხადა.

ნინო ქადაგიძემ იუსტიციის უმაღლესი საბჭოს სხდომაზე სახელმწიფო დეპარტამენტის განცხადებას "უმძიმესი ბრალდებები" უწოდა და საზოგადოებას მოუწოდა, რომ ნაადრევი დასკვნების გამოტანისგან თავი შეიკავოს.

"ამერიკის შეერთებული შტატების სახელმწიფო დეპარტაენტის მდივნის მიერ გუშინ ჩემი კოლეგების მიმართ გაჟღერდა უმძიმესი ბრალდებები. მე მაქსიმალურად მინდა ვიყო მშვიდი და კორექტული. აქედან გამომდინარე, ძალიან დიდ იმედს ვიტოვებ, რომ წარმოდგენილი იქნება ან შესაბამისი მტკიცებულებები ან საკითხი გადაიხედება კიდევ ერთხელ დეპარტამენტის მიერ. ყოველ შემთხვევაში, მე ამის სურვილი მაქვს და ძალიან დიდ იმედს ვიტოვებ. რამეთუ, ეს განცხადებები სასამართლოში იწვევს ძალიან დიდ დაძაბულობას და მე, როგორც უზენაესი სასამართლოს თავმჯდომარემ და საბჭოს თავმჯდომარემ, მინდა ჩემს კოლეგებს მაქსიმალურად მოვუწოდო სიმშვიდისკენ. ასევე, ვთხოვო საზოგადოებას, რომ ნუ გამოიტანენ ჯერჯერობით ნაადრევ დასკვნებს. კიდევ ერთხელ განვმეორდები და ვიტყვი, რომ ძალიან დიდ იმედს ვიტოვებ, რომ ძალიან ბევრი რამე გაირკვევა და იმ კითხვებზე, რომლებზეც პასუხი არ არის გაცემული, გაიცემა პასუხები და მე ამ პასუხებს მივიღებ", - განაცხადა ნინო ქადაგიძემ.  

შეგახსენებთ,  გუშინ, 5 აპრილს აშშ-ის სახელმწიფო დეპარტამენტმა მოსამართლე მიხეილ ჩინჩალაძე, ლევან მურუსიძე, ირაკლი შენგელია და ვალერიან ცერცვაძე კორუფციის გამო დაასანქცირა.

სანქცია ითვალისწინებს აღნიშნული პირებისა და მათი უშუალო ოჯახის წევრების მიმართ აშშ-ში შესვლის აკრძალვას. 

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი