გიგაური: მაშინ, როცა ჩვენს წინააღმდეგ ფართომასშტაბიანი კამპანიაა, ღირსეული კანდიდატების უხერხულ მდგომარეობაში ჩაყენება არ გვსურს

2015-02-06 12:43:44, 400 ნახვა

"საერთაშორისო გამჭვირვალობა-საქართველოს" აღმასრულებელმა დირექტორმა ეკა გიგაურმა ის მიზეზები განმარტა, რის გამოც პრეზიდენტს უზენაესი სასამართლოს თავმჯდომარის თანამდებობაზე კანდიდატს არ შესთავაზებენ.
როგორც გიგაურმა "ექსპრესნიუსს" განუცხადა, იმ ვითარებაში, როცა მათ წინააღმდეგ ფართომასშტაბიანი კამპანია მიმდინარეობს, ბევრი ღირსეული კანდიდატის უხერხულ მდგომარეობაში ჩაყენება არ სურთ. გიგაურის შეფასებით, სწორედ იმის გამო, რომ კანდიდატი "საერთაშორისო გამჭვირვალობა-საქართველოს" მიერ წარდგენილი იქნება, პარლამენტის უმრავლესობამ მას შესაძლოა, მხარი არ დაუჭიროს.
"მაშინ, როდესაც ჩვენს წინააღმდეგ ფართომასშტაბიანი კამპანიაა, ჩვენ არ გვინდა, უხერხულ მდგომარეობაში ჩავაყენოთ ძალიან ბევრი ღირსეული კანდიდატი. რადგანაც ვფიქრობთ, რომ ზუსტად იმიტომ რომ ჩვენ წარვადგენთ, მას შეიძლება მხარი არ დაუჭიროს პარლამენტის უმრავლესობამ. თუმცა ჩვენ როგორც იცით ამ პროცესში ჩართულები ვიყავით და კრიტერიუმების დადგენაშიც მოვიღეთ აქტიური მონაწილეობა",-განაცხადა ეკა გიგაურმა.
ამასთან, გიგაურმა პროფესიულ წრეებს, უნივერსიტეტებსა და სხვა ჯგუფებს მოუწოდა, ამ მიმართულებით იაქტიურონ, რათა საბოლოოდ პრეზიდენტს დიდი არჩევანი ქონდეს.
შეგახსენებთ, პრეზიდენტმა გიორგი მარგველაშვილმა კომპეტენტურ პირებს მოუწოდა, უზენაესი სასამართლოს თავჯდომარეობის კანდიდატები 9 თებერვლამდე წარადგინონ.