ამომრჩეველთა პერსონალური მონაცემების დაცვა იყო ცესკოს თავმჯდომარის, მისი მოადგილის გიორგი სიორიძის და სახელმწიფო ინსპექტორის შეხვედრის მთავარი თემა, რომელიც ცენტრალურ საარჩევნო კომისიაში (ცესკო) დღეს გაიმართა.

შეხვედრაზე გიორგი კალანდარიშვილმა 2 ოქტომბრის მუნიციპალური არჩევნებისთვის საარჩევნო ადმინისტრაციის მზადების პროცესზე ისაუბრა. ცესკოს თავმჯდომარემ ყურადღება გაამახვილა საარჩევნო კაბინების განახლების საკითხზე და აღნიშნა, რომ მიუხედავად იმისა რომ მათი დიზაინი შეიცვალა, ამომრჩევლის ხმის ფარულობა კვლავ დაცულია.  მისივე განცხადებით საარჩევნო ადმინისტრაციისთვის მნიშვნელოვანია, რომ როგორც წინასაარჩევნო პროცესში, ისე კენჭისყრის დღეს თითოეული ამომრჩევლის პერსონალური მონაცემები მაქსიმალურად იყოს დაცული, ამიტომ ამ საკითხებთან დაკავშირებით სახელმწიფო ინსპექტორთან თანამშრომლობა ძალიან მნიშვნელოვანია. 

„საარჩევნო ადმინისტრაცია ამუშავებს ძალიან მნიშვნელოვან ინფორმაციას, რომელიც უკავშირდება ამომრჩევლის ერთიანი სიების ფორმირებას, შესაბამისად ჩვენთვის ერთ-ერთ ფუნდამენტურ საკითხს წარმოადგენს ამომრჩეველთა პერსონალური მონაცემების დაცვის უზრუნველყოფა და ამ მხრივ შესაბამისი გარანტიების შეთავაზება, რა მიმართულებითაც ჩვენ არაერთ საქმიანობას ვახორციელებთ. ჩვენთვის ძალიან მნიშვნელოვანია ამ პროცესში სახელმწიფო ინსპექტორის აპარატის ჩართულობა, მათი მოსაზრებების და რეკომენდაციებს გათვალისწინება იმისთვის, რომ ეს დაცულობის ხარისხი კიდევ უფრო მეტად იყოს გაზრდილი.“ - განაცხადა გიორგი კალანდარიშვილმა.

როგორც სახელმწიფო ინსპექტორმა ლონდა თოლორაიამ განაცხადა, მისი უწყება აქტიურად ითანამშრომლებს ცენტრალურ საარჩევნო კომისიასთან როგორც ცნობიერების ამაღლების მიმართულებით, ისე სამართლებრივ ნაწილშიც.

„სახელმწიფო ინსპექტორის სამსახურისა და ცენტრალური საარჩევნო კომისიის თანამშრომლობა არის  არსებითად მნიშვნელოვანი, განსაკუთრებით წინასაარჩევნო პროცესში და კენჭისყრის დღეს, ვინაიდან ამომრჩევლის პერსონალური მონაცემების დაცვა არის არსებითი მნიშვნელობის საკითხი. არჩევნების დღეს გვეყოლება გამოყოფილი ერთი პირი, რომელიც იქნება საკონტაქტო პირი როგორც ამომრჩეველთან, ისე საარჩევნო ადმინისტრაციასთან,“ - განაცხადა ლონდა თოლორაიამ შეხვედრის შემდეგ.

შეხვედრა ცენტრალურ საარჩევნო კომისიაში გაიმართა და მას ცესკოს იურიდიული დეპარტამენტის უფროსი გიორგი სანტურიანი და სახელმწიფო ინსპექტორის იურიდიული სამსახურის უფროსი ლანა ღუნაშვილი ესწრებოდნენ.

ავტორი: NS (სტატია დაფინანსებულია),

სოციალური ქსელები

Bloomberg - ევროპამ უარი თქვა რუსეთის უსაფრთხოების მოთხოვნების განხილვაზე მანამ, სანამ უკრაინაში ომი არ დასრულდება

რომელი ქვეყნების მოქალაქეები დეპორტირდნენ საქართველოდან ყველაზე ხშირად 2026 წელს?

ჩინეთის ვიცე-პრეზიდენტი - ჩინური წარმოების პროდუქცია, განსაკუთრებით ავტომობილები, საქართველოს მოსახლეობაში დიდი პოპულარობით სარგებლობს

FT: აშშ-ის დემოკრატები უკრაინისთვის 15 მილიარდი დოლარის დახმარების გამოყოფას ამზადებენ და რუსეთის წინააღმდეგ სანქციების გამკაცრებას სურთ