2021-04-29 13:08:06, 679 ნახვა

---

სალომე სამადაშვილი - „ქართული ოცნება“ ადმინისტრაციული დარღვევებისთვის სასჯელს ამკაცრებს, ვაპირებთ, დავაყენოთ საკითხი, რომ კენჭისყრა გადაიდოს

ვაპირებთ, დავაყენოთ საკითხი, რომ კენჭისყრა გადაიდოს, - ამის შესახებ ოპოზიციონერმა ლიდერმა, სალომე სამადაშვილმა ადმინისტრაციულ სამართალდარღვევათა კოდექსში შესატან ცვლილებებთან დაკავშირებით განაცხადა.

მისი თქმით, ცვლილებები ეწინააღმდეგება სიტყვისა და გამოხატვის თავისუფლების პრინციპებს და იმ შთანხმების სულისკვეთებას, რომელიც შარლ მიშელის მედიაციით იქნა მიღწეული.

„ქართული ოცნება“ ამკაცრებს სასჯელს ადმინისტრაციული დარღვევებისთვის. ეს ერთი მხრივ ეწინააღმდეგება სიტყვისა და გამოხატვის თავისუფლების პრინციპებს ქვეყანაში და ასევე მიგვაჩნია, რომ ეწინააღმდეგება სულისკვეთებას იმ შეთანხმების, რომელიც მიღწეულ იქნა შარლ მიშელის მედიაციის დახმარებით. ამიტომ ჩვენ დღეს აქ, საქართველოს პარლამენტში ვაპირებთ, რომ დავაყენოთ საკითხი, რომ გადაიდოს კენჭისყრა და განხილვა ამ საკითხის და მიეცეს შესაძლებლობა როგორც ოპოზიციას, ასევე სამოქალაქო აქტივისტებს, რომ საკუთარი აზრი გამოხატონ ამ ცვლილებებთან დაკავშირებით. ეს პოზიცია რომ დაგვეფიქსირებინა, სწორედ ამიტომ მოვედით პარლამენტში“, - განაცხადა სალომე სამადაშვილმა.

ცნობისთვის, „ქართული ოცნების“ დეპუტატთა ჯგუფის მიერ ინიცირებული კანონპროექტის თანახმად, ადმინისტრაციულ სამართალდარღვევათა კოდექსის 166-ე მუხლს ემატება მე-2 ნაწილი, რომლის მიხედვით, წვრილმანი ხულიგნობის ჩამდენი პირის მიერ ამ სამართალდარღვევის განმეორებით ჩადენა გამოიწვევს დაჯარიმებას 1500-დან 2000 ლარამდე, ან 7-დან 15 დღემდე ადმინისტრაციულ პატიმრობას.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი