საქართველოს ეკონომიკისა და მდგრადი განვითარების სამინისტროს შპს „საქართველოს ფოსტასა“ და საქართველოს ტექნიკურ უნივერსიტეტს შორის მემორანდუმი გაფორმდა.

მემორანდუმის თანახმად, ენერგეტიკისა და ტელეკომუნიკაციების ფაკულტეტის მეოთხე კურსის სტუდენტებს შესაძლებლობა ექნებათ, საფოსტო საქმიანობა შეისწავლონ.

„საქართველოს ფოსტა“ მონაწილეობას მიიღებს სხვადასხვა საგანმანათლებლო პრაქტიკული ღონისძიებების შემუშავებასა და განხორციელებაში. დაიგეგმება და განხორციელდება შეხვედრები, სემინარები, კონფერენციები, ტრენინგები და სხვა სასწავლო პროცესები, ასევე ფოსტა უზრუნველყოფს უნივერსიტეტის წარმატებული სტუდენტების პრაქტიკულ სწავლებას.

„საფოსტო საქმიანობის სწავლების განახლება მნიშვნელოვან გავლენას იქონიებს დარგის განვითარებაზე საქართველოში, შესაბამისად ქვეყანაში გვეყოლება  სპეციალიზებული  კადრები, რომლებიც დღეისთვის საკმაოდ დეფიციტურია. თუ გადავხედავთ როგორც ადგილობრივ, ისე საერთაშორისო ბაზარს, საფოსტო ბიზნესი ერთ-ერთი მოწინავე დარგია. ეს სფერო საკმაოდ სპეციფიკურია, ვინაიდან არ შემოიფარგლება მხოლოდ ქვეყნის შიდა საქმიანობით. საფოსტო საქმიანობა ავტომატურად გულისხმობს საერთაშორისო ურთიერთობებს, ეს ურთიერთობები მოითხოვს შესაბამის სტანდარტებს.  საქართველოში, სამწუხაროდ არ არსებობდა არცერთი სახელმძღვანელო, რომლის გამოყენებაც  შესაძლებელი იქნებოდა  თანამედროვე საფოსტო ბიზნესის განსახორციელებლად.  ამიტომ ჩვენ, საერთაშორისო სტანდარტების გათვალისწინებით, შევქმენით რიგი სახელმძღვანელოები,  რომლითაც ჩვენთან დასაქმებულებს ვასწავლით. რაც მთავარია მასალა სრულად არის მორგებული საერთაშორისო სტანდარტებს. შესაბამისად, აქედან მიღებული  ცოდნის გამოყენებას  ნებისმიერ სხვა ქვეყანაში შეძლებენ“,- განაცხადა „საქართველოს ფოსტის“ გენერალურმა დირექტორმა ლევან ჩიკვაიძემ.

როგორც ტექნიკური უნივერსიტეტის რექტორმა, არჩილ ფრანგიშვილმა აღნიშნა, მემორანდუმი ძალიან მნიშველოვანია, რადგან „საქართველოს ფოსტა“ ერთ-ერთი სერიოზული დამსაქმებელია ქვეყანაში.

„ჩვენთვის მნიშვნელოვანია დღევანდელი დღე. მემორანდუმი რომელიც გაფორმდა საქართველოს ფოსტასთან, ბევრი სხვადასხვა  მიმართულებებითაც  საინტერესოა.  პირველი არის ის, რომ  საქართველოს ფოსტა არის ერთ-ერთი უმსხვილესი  ორგანიზაცია და ერთ-ერთი სერიოზული დამსაქმებელი.  მეორე ის, რომ ჩვენ გვინდა ფოსტასთან ერთად განვვითარდეთ. ჩვენ მოვისმინეთ ბატონი ლევანისგან ფოსტის განვითარების ძალიან საინტერესო კონცეფცია, რომელიც თანამედროვე ტექნოლოგიაზეა დაყრდნობილი.  ეს იქნება ურთიერთშეთანხმებული სასწავლო პროგრამები და შესაბამისად, ჩვენ  გამოვუშვებთ კადრებს, რომლებიც მზად იქნებიან იმ სივრცეში მუშაობისთვის, რასაც საქართველოს ფოსტა ქვია“, - განაცხადა არჩილ ფრანგიშვილმა.

„საქართველოს ფოსტა“ ქვეყანაში უმსხვილეს საფოსტო ორგანიზაციას წარმოადგენს, რომელიც გამოირჩევა როგორც მომსახურების დიდი არჩევანით, ასევე სერვის ცენტრების ყველაზე ფართო ქსელით. დღეს „საქართველოს ფოსტა“  82 სერვის ცენტრით არის წარმოდგენილი მთელი ქვეყნის მასშტაბით. კომპანიაში დასაქმებულია 3000-მდე მაღალკალიფიციური კადრი და ქვეყანაში ერთ-ერთ მსხვილ დამსაქმებლად ითველება.

(NS)

ავტორი: ,

სოციალური ქსელები

უკრაინის შეიარაღებულმა ძალებმა ვორონეჟში რაკეტსაწინააღმდეგო ნახევარგამტარების ქარხანაზე იერიში მიიტანეს

23-25 ივნისს საქართველოში მოსალოდნელია დროგამოშვებით ნალექიანი ამინდი

Nestle-მ ბრიტანეთის მიერ სანქცირებულ ტელეკომპანია „იმედში“ რეკლამის განთავსების გამო შიდა გამოძიება დაიწყო

ხალხის ფულით ივანიშვილის რეჟიმი 2026 წელს გამოშვებულ 592 ახალ ავტომობილს ₾47 მილიონად ყიდულობს