თბილისის მერიასა და რელიგიის სააგენტოს შორის მემორანდუმი გაფორმდა

2017-05-19 14:01:20, 1657 ნახვა

საზოგადოება

თბილისის მერიასა და რელიგიის საკითხთა სახელმწიფო სააგენტოს შორის ურთიერთთანამშრომლობის მემორანდუმი გაფორმდა.

დოკუმენტს ხელი თბილისის მერმა დავით ნარმანიამ და რელიგიის საკითხთა სააგენტოს თავმჯდომარემ ზაზა ვაშაყმაძემ მოაწერეს.

მერიის ცნობით, შეთანხმების მიზანია, დედაქალაქში არსებული საკულტო-რელიგიური დანიშნულების ნაგებობების დაცვისა და გამოყენების საკითხებზე ერთობლივი პროგრამებისა და პროექტების განხორციელება.

მემორანდუმი ითვალისწინებს ერთობლივი ღონისძიებების მომზადებას, რომელიც ხელს შეუწყობს ინტერრელიგიური და კულტურათაშორისი დიალოგის გაღრმავებას, სამოქალაქო საზოგადოებაში ტოლერანტული გარემოს შექმნას.

„სხვადასხვა ხასიათის რელიგიურ საკითხებზე რელიგიის სააგენტოსთან ჩვენ მჭიდროდ ვთანამშრომლობთ. ჩვენი თანამშრომლობა მოიცავს ისეთ საკითხებს, როგორიც არის ქალაქის სხვადასხვა ტერიტორიაზე საკულტო-რელიგიური შენობების მშენებლობა და ამ თემებთან დაკავშირებული ღონისძიებების ჩატარების ორგანიზება. მემორანდუმის ხელმოწერის შემდეგ, ეს თანამშრომლობა აქტიურად გაგრძელდება და კიდევ უფრო მჭიდრო გახდება“- განაცხადა დავით ნარმანიამ.

(NS)

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან