კანდელაკი: შემოტანილი კანონპროექტით, თუ ადამიანი უზენაესი სასამართლოს მოსამართლე იყო, მისთვის გამოსაცდელი ვადა უქმდება

2017-02-07 14:58:32, 1852 ნახვა

პოლიტიკა კომენტარი

ფრაქცია „ევროპული საქართველოს“ წევრის გიორგი კანდელაკის განცხადებით, პარლამენტში ინიცირებულია კანონპროექტი, რომლის თანახმადაც,

თუ უზენაესი სასამართლოს მოსამართლეს სააპელაციო სასამართლოს მოსამართლეობის სურვილი ექნება, 3 წლიანი გამოსაცდელი ვადა არ შეეხება.

კანდელაკის მტკიცებით, ამის მიზეზი „რუსთავი2“- ის საქმის მოსამართლე მიხეილ ჩინჩალაძესა და სახელმწიფოს შორის მოლაპარაკებაა.

„მიხეილ ჩინჩალაძის მოთხოვნით, შემოტანილია პარლამენტში კანონის ნორმა, რომლის მიხედვითაც, თუ ადამიანი იყო წარსულში უზენაესი სასამართლოს მოსამართლე, მაშინ მისთვის უქმდება სამ წლიანი გამოსაცდელი ვადა. ესაა პოლიტიკური კორუფციის აშკარა ფაქტი, სხვა საქმეა და ლეგიტიმური დისკუსიაა, 3 წლიანი გამოსაცდელი ვადის საკითხი, უნდა გაუქმდეს თუ არა ყველა დანიშნულ მოსამართლესთან მიმართებაში, მაგრამ დაუშვებელია კანონის ნორმის ერთ კონკრეტულ პირზე მორგება“,-განაცხადა გიორგი კანდელაკმა.

მას უმრავლესობის წევრმა ვანო ზარდიაშვილმა უპასუხა:

„რაღაცა შოუ დადგა კანდელაკმა, რომ ეს ცვლილებები ხდება ერთი პერსონისთვის, ეს მოიკითხოს თავის გუნდში, ესენი არიან ის ხალხი, ერთი ადამიანის ხუშტურის გამო, რომ ვიღაცა დეპუტატი გაეხადათ, საპარლამენტო ასაკი გახადეს 21 წელი. ამ ცვლილებებს ეთანხმება და აღიარებს ყველა ამ ქვეყანაში, პრეზიდენტის ადმინისტრაცია, ვენეციის კომისია, ეს ცვლილებები ეტაპობრივად გავრცელდება ყველა მოსამართლეზე“,-აღნიშნა ვანო ზარდიაშვილმა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან