2016-10-06 17:44:44, 648 ნახვა

---

ლევან იზორია ლიტვის ელჩს გეიდრიუს პოუჯიუნასს შეხვდა

ლატვიის რესპუბლიკის ელჩის შემდეგ, საქართველოს თავდაცვის მინისტრმა ლიტვის რესპუბლიკის ელჩს უმასპინძლა.

შეხვედრას თავდაცვის მინისტრის პირველი მოადგილე ლელა ჩიქოვანი და საქართველოში ლიტვის რესპუბლიკის თავდაცვის ატაშე, ვიცე-პოლკოვნიკი ვიტაუტას რაკაუსკასი დაესწრნენ.

თავდაცვის სამინისტროს ინფორმაციით, შეხვედრაზე ორ ქვეყანას შორის თავდაცვის სფეროში არსებულ მჭიდრო თანამშრომლობასა და მომავალში მისი გაგრძელების მნიშვნელობაზე ისაუბრეს.

ლევან იზორიამ გეიდრიუს პოუჯიუნასს ნატო-საქართველოს არსებითი პაკეტის (SNGP) იმპელემენტაციის პროცესში მხარდაჭერისა და ნატო-საქართველოს წვრთნისა და შეფასების ერთობლივ ცენტრში (JTEC) ექსპერტის მოვლინებისთვის მადლობა გადაუხადა.

საუბარი შეეხო ლიტვასა და საქართველოს შორის კიბერუსაფრთხოების, ლოგისტიკისა და სტრატეგიული კომუნიკაციის სფეროში ურთიერთობას, ასევე, საქართველოსა და ლიტვის სპეციალური ოპერაციების ძალების ინტენსიურ თანამშრომლობას, მათ შორის, ერთობლივ წვრთნებს, რომელშიც სპეციალური ოპერაციების ძალები მონაწილეობენ.

საქართველოს თავდაცვის მინისტრმა ყურადღება ლიტვის მხრიდან საქართველოსთვის სამხედრო განათლების კუთხით გაწეულ მხარდაჭერაზეც გაამახვილა. მხარეებმა იმედი გამოთქვეს, რომ სამხედრო განათლების მიმართულებით, ორ ქვეყანას შორის არსებული თანამშრომლობა მომავალშიც შენარჩუნდება.

 

(NS)

 

---

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

---

დღის თემა

მთავარი თემა

ინტერვიუ - ექსკლუზივი