კვლევის თანახმად, ”სადგურის მოედანთან” მტვრის შემცველობა დასაშვებ ნორმას აღემატება

2016-10-04 13:59:59, 661 ნახვა

საზოგადოება

მეტროსადგურ ”სადგურის მოედანთან” მტვრის ერთჯერადი კონცენტრაცია კვადრატულ მეტრზე მაქსიმალურ ზღვარს აღემატება.

ამის შესახებ გარემოს დაცვის სამინისტროს მიერ გავრცელებულ გარემოს დაბინძურების ექსპრეს-ლაბორატორიის კვლევის შედეგებშია აღნიშნული.

კვლევა 30 სექტემბრიდან 3 ოქტომბრის ჩათვლით ჩატარდა. გამოკვლეულია მტვრის, ნახშირორჟანგის, აზოტის დიოქსიდის შემცველობა კვადრატულ მეტრზე, ელექტრო-მაგნიტური გამოსხივება და ხმაურის დონე.

კვლევა თბილისში, დედაქალაქის გარეუბნებსა და რუსთავში, სულ 22 პუნქტზე ჩატარდა.

კვლევის შედეგების მიხედვით კვადრატულ მეტრზე მტვრის შემცველობა დასაშვებ ნორმას მხოლოდ მეტროსადგურ ”სადგურის მოედანთან” აღემატება.

რაც შეეხება ყველაზე ხმაურიან ადგილებს, კვლევის თანახმად, ყველაზე ხმაურიანი ადგილი მეტროსადგურ ”300 არაგველის” მიმდებარე ტერიტორიაა. ხმაურის მაქსიმალური დონე დასაშვებ ზღვარს აღემატება მეტროსადგურ „ახმეტელის თეატრთან“, ასევე „სარაჯიშვილთან“, „ნაძალადევთან“, „სადგურის მოედანთან“, მეტროსადგურ „მარჯანიშვილთან“, აბანოთუბანში და წყნეთში ჰიპერმარკეტ ,,სმარტთან“.

გარემოს დაბინძურების ექსპრეს-ლაბორატორიის კვლევის შედეგები

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან