კობახიძე: არ ვიცი, რატომ აკრიტიკებენ შს მინისტრს, რა არ მოეწონათ

2016-09-07 16:52:04, 702 ნახვა

პოლიტიკა

პარლამენტის ვიცე სპიკერის მანანა კობახიძისთვის გაუგებარია კრიტიკა, რომელიც შინაგან საქმეთა მინისტრის გიორგი მღებრიშვილის განცხადებას მოჰყვა.

მისივე თქმით, პოლიციელის მუნდირი აუცილებლად დაცული უნდა იყოს.

,,ის, რომ პოლიციელის საქმიანობა ნამდვილად უნდა იყოს დაფასებული და პოლიციელის მუნდირი უნდა იყოს დაცული ეს ცხადია. არ შეიძლება ამ პროფესიის დისკრედიტაცია. ეს ყველაფერი ახლავს იმას, რომ დამნაშავე უნდა იყოს დასჯილი, ნებისმიერი გამოვლენა ძალადობის, თუ სხვა ტიპის დანაშაულის, უნდა იყოს სწრაფად გამოვლენილი. პოლიციელი ვალდებულია, დროულად აღკვეთოს დანაშაული და ჩვენ გვჭირდება სწორედ ეფექტური პოლიციელი, რომელიც თავის მოვალეობას ასრულებს მაღალ დონეზე. ამაზეა საუბარი, მე არვიცი რატომ აკრიტიკებენ შინაგან საქმეთა მინისტრს, რა არ მოეწონათ?“-განაცხადა მანანა კობახიძემ.

შეგახსენებთ, რომ გუშინ გიორგი მღებრიშვილმა ბრიფინგი გამართა, სადაც განაცხადა, რომ ყველა მართალ პოლიციელს დაიცავს და არ დაუშვებს, რომ ერთეული შემთხვევების გამო პოლიციელთა კორპუსს შეურაცხყოფას აყენებდნენ, მოხდეს კეთილსინდისიერი სამართალდამცველების დემოტივაცია, რაც პირდაპირ პროპორციულად აისახება უსაფრთოხების ხარისხზე.