ეროვნულ სასწავლო ცენტრ „კრწანისში“ სამეთაურო-საშტაბო სწავლება „დიდგორი 2016“-ის ღია კარის დღე გაიმართა. სწავლების მიმდინარეობას საქართველოს პრეზიდენტი გიორგი მარგველაშვილი, საქართველოს თავდაცვის მინისტრი თინათინ ხიდაშელი და გენერალური შტაბის უფროსი, გენერალ-მაიორი ვახტანგ კაპანაძე გაეცნენ.

„დიდგორი 2016“-ის ღია კარის დღეს საქართველოს მთავრობის და პარლამენტის წევრებთან ერთად საქართველოში აკრედიტებული უცხო ქვეყნების სამხედრო ატაშეები დაესწრნენ.
მოწვეულ სტუმრებს სწავლების ხელმძღვანელობამ ღონისძიების მიმდინარეობის შესახებ დეტალური ინფორმაცია მიაწოდა. მათ საშუალება ჰქონდათ, პირადად დაეთვალიერებინათ გენერალური შტაბის მართვის პუნქტი, უშიშროების საბჭო და სიმულაციური ცენტრი.

„ძალიან წარმომადგენლობითი დღეა. ბევრი სტუმარი გვეწვია, მათ შორის იყვნენ ატაშეები. ძალიან გაგვიხარდა უმაღლესი მთავარსარდლის მობრძანება მინისტრთან ერთად. მათ საკმაოდ მწვავე კითხვები დასვეს. ზოგი პასუხი დამაკმაყოფილებელი იყო, ზოგი - არა. სწავლებაც იმიტომ იმართება, რომ გამოვავლინოთ ხარვეზები, რომელიც შეიძლება რეალურ ვითარებაში აღმოჩნდეს და მაქსიმალურად გამოვასწოროთ. სწავლების სცენარი, რა თქმა უნდა, თავდაცვით მოქმედებებს ითვალისწინებს. გათვალისწინებულია ყველა ის ტენდენცია, რაც ჰიბრიდული ომებისთვის არის დამახასიათებელი. ასევე გათვალისწინებულია რეალური გარემო, რეალური რელიეფი და რეალური კლიმატური პირობები“, - განაცხადა გენერალ-მაიორმა ვახტანგ კაპანაძემ.

„დიდგორი 2016“ სამთავრობო უწყებათაშორის სწავლებას წარმოადგენს. სწავლების მიზანი სახელმწიფო ორგანიზაციებს, გენერალურ შტაბსა და სარდლობებს შორის სტრატეგიულ და ოპერატიულ დონეზე ურთიერთგაგებისა და კოორდინაციის გაღრმავებაა, მნიშვნელოვანია ასევე, სარდლობების დამოუკიდებლად მუშაობის შესაძლებლობების დადგენა და მართვის ცენტრების მოქმედებების დახვეწა ოპერატიული სარდლობის დონიდან ეროვნულ დონემდე.

წვრთნაში სიმულაციური სწავლების სისტემებია გამოყენებული. სწავლების სცენარი ომის რეალურ მოვლენებთან მიახლოებულ ვითარებაზეა დამყარებული. წვრთნების დროს თავდაცვითი ოპერაციები ვირტუალური მოწინააღმდეგის მიმართ მოდელირებულ გეოპოლიტიკურ გარემოში ხორციელდება. სწავლებაში მონაწილე სამთავრობო უწყებების წარმომადგენლები მთლიანად თავდაცვის სისტემის დაქვემდებარებაში კოორდინაციულ ოპერაციებს აწარმოებენ.

„დიდგორი 2016“-ში 700-მდე სამხედრო მოსამსახურე მონაწილეობს. სწავლებაში ასევე ჩართულია ყველა სამთავრობო უწყების 80-მდე წარმომადგენელი.

სწავლება „დიდგორი 2016“ 1 აგვისტოს დასრულდება.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

რომის პაპი ჟურნალისტებს - მიხარია, რომ აქ ხართ, კარგი გაშუქება ყველგან და ყველასთვის მნიშვნელოვანია

თიბისი კონცეპტის მხარდაჭერით ამირ კაკაბაძის საიუბილეო წიგნი გამოიცა

Transparency International Georgia - მიხეილ სააკაშვილის სახელი შეტანილი იქნება ჩვენი ორგანიზაციის მიერ შედგენილი პოლიტიკური პატიმრების სიაში

რუსეთი სამშენებლო კომპანიების გაკოტრების ტალღამ მოიცვა