2016-06-10 19:59:47, 625 ნახვა

---

საქალაქო სასამართლოს გადაწყვეტილებით, 17 მაისს დაკავებულ აქტივისტს პოლიციისთვის წინააღმდეგობის გაწევა არ დაუდასტურდა

თბილისის საქალაქო სასამართლოს გადაწყვეტილებით, 17 მაისს დაკავებულ აქტივისტს პოლიციისთვის წინააღმდეგობის გაწევა არ დაუდასტურდა.

2016 წლის 17 მაისს სტენსილების გაკეთებისთვის აქტივისტი მარი კურტანიძე დააკავეს, სასამართლომ ის სამართალდამრღვევად ცნო წარწერის გაკეთებისთვის ადმინისტრაციულ სამართალდარღვევათა კოდექსის 150-ე მუხლით [შენობის იერსახის დამახინჯება] და 50 ლარით დააჯარიმა.

წინა სასამართლო სხდომაზე მარი კურტანიძემ განაცხადა, რომ პოლიციელისთვის წინააღმდეგობა არ გაუწევია, რადგან არც იცოდა, რომ პირი, რომელიც მათ მისდევდა, პოლიციელი იყო. ამის დამადასტურებლად სასამართლოს ფოტო წარუდგინა, რომელზეც ასახულ პირს არ აცვია პოლიციის ფორმა.

სასამართლო 17 მაისის ღამეს დაკავებული 6 პირის საქმეს ცალკ-ცალკე იხილავს. ყველა მათგანს ბრალი ადმინისტრაციულ სამართალდარღვევათა კოდექსის 150-ე [იერსახის დამახინჯება] და 173 [პოლიციელისთვის წინააღმდეგობის გაწევა] მუხლების დარღვევაში ედებათ.

ცნობისთვის, 17 მაისის ღამეს პოლიციამ ანტიჰომოფობიური წარწერების გაკეთების მცდელობის გამო 10 პირი დააკავა, მათგან 7 საპატრიარქოს შენობასთან, 3 კი- პარლამენტის.

17 მაისი ჰომოფობიასთან და ტრანსფობიასთან ბრძოლის საერთაშორისო დღეა. 

---

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

---

დღის თემა

მთავარი თემა

ინტერვიუ - ექსკლუზივი