წეროვანში ხვალ, დათო ტურაშვილის მკითხველებთან შეხვედრა გაიმართება

2015-02-26 18:07:22, 8122 ნახვა

კულტურა

სოფელ წეროვანში ხვალ, 13:00 საათზე მწერალ დათო ტურაშვილის მკითხველებთან შეხვედრა გაიმართება.
წეროვანის საჯარო სკოლაში, “საბას” ლაურეატი მწერალი, დევნილ მოწაფეებსა და მათ მშობლებთან ისაუბრებს ლიტერატურაზე, საკუთარ შემოქმედებასა და ახალ წიგნებზე, უპასუხებს შეკითხვებს.
ეს შეხვედრა, სახელწოდებით “შეხვედრის საბა-ბი” ლიტერატურული პრემია “საბას” ახალი აქციაა, რომლის ფარგლებში “საბას” ლაურეატები წლის განმავლობაში საქართველოს სხვადასხვა კუთხეებს მოივლიან და ადგილობრივ მკითხველებს შეხვდებიან. ამავე რეგიონის ზოგიერთი სოფლის სკოლებს კი საჩუქრად გადასცემენ “საბას” ელექტრონული წიგნების ბიბლიოთეკას.
ეს არის “საბას” სოციალურ-საგანმანათლებლო აქცია, რომელიც სხვა და სხვა მიმართულებებს მოიცავს. ქვეყნის ყველაზე პრესტიჟული ლიტერატურული პრემია წელს თბილისის ფარგლებს სცილდება და რეგიონებში აკითხავს მკითხველებს.
წეროვანის საჯარო სკოლაში „საბას“ ლაურეატები გახსნიან ელექტრონული ბიბლიოთეკის სამკითხველო კუთხეს. სკოლას საჩუქრად გადაეცემა სპეციალური სამკითხველო სტენდი, ლეპტოპი, შიგ ჩატვირთული ელექტრონული ბიბლიოთეკით. ამ აქციაში ჩაერთნენ ქართული გამომცემლობებიც - დიოგენე, ინტელექტი, სიესტა, პალიტრა L, არტანუჯი, საუნჯე და სხვა. სწორედ მათ მიერ გამოცემული წიგნებითაა შედგენილი ის ელექტრონული ბიბლიოთეკა, რომელიც “საბასგან” და გამომცემლობებისგან ბავშვებს საჩუქრად გადაეცა.
მსგავსი შეხვედრები გაიმართება ყოველთვიურად და მოიცავს საქართველოს სხვა რეგიონებს.