საქართველოს თავდაცვის მინისტრის მოადგილემ ანა დოლიძემ ლატვიის რესპუბლიკაში შეხვედრები გამართა. სამუშაო ვიზიტის ფარგლებში ანა დოლიძე ლატვიის პარლამენტის საგარეო საქმეთა კომიტეტის თავმჯდომარეს, ოიარს ერიკს კალნინშს და თავდაცვის, საშინაო საქმეთა და კორუფციასთან ბრძოლის კომიტეტის თავმჯდომარეს აინარს ლატკოვსკის შეხვდა.

მხარეებმა საქართველოს ევრო-ატლანტიკური ინტეგრაციის საკითხებზე და ნატოს ვარშავის სამიტის მოლოდინებზე ისაუბრეს. ქართულმა მხარემ მადლობა გადაუხადა ლატვიელ პარლამენტარებს საქართველოს ევრო-ატლანტიკური ინტეგრაციის აქტიური მხარდაჭერისათვის და აღნიშნა, რომ საქართველო ნატოს ვარშავის სამიტზე სამომავლო თანამშრომლობის კონკრეტულ მესიჯებს ელოდება.

კალნინშის განცხადებით, ლატვია იყო და რჩება საქართველოს, როგორც ევრო-ატლანტიკური, ისე ევროპული ინტეგრაციის მხარდამჭერი ქვეყანა და თვის ბოლოს ალბანეთში დაგეგმილ ნატოს საპარლამენტო ასამბლეის მორიგი სხდომის დროს ლატვიური მხარე შეეცდება, კიდევ ერთხელ აღინიშნოს საქართველოს მიერ განცდილი პროგრესი და ხაზი გაესვას პრაქტიკული თანამშრომლობის მნიშვნელობას. მან იმედი გამოთქვა, რომ ვარშავის სამიტზე სათანადოდ აისახება საქართველოს პერსპექტივა ალიანსში გაწევრიანების მიმართულებით. შეხვედრაზე მნიშვნელოვანი ყურადღება დაეთმო საქართველოს შიდა პოლიტიკურ პროცესებს, რეგიონში მიმდინარე მოვლენებს და საქართველოს ოკუპირებულ ტერიტორიებზე არსებულ ვითარებას.

 მოგვიანებით, საქართველოს თავდაცვის მინისტრის მოადგილე ლატვიის თავდაცვის სამინისტროს სახელმწიფო მდივანს იანის გარისონს და ამავე სამინისტროს საპარლამენტო მდივანს ანდრეის პანტელეევს შეხვდა. შეხვედრებზე მხარეებმა ორ ქვეყანას შორის თავდაცვის სფეროში თანამშრომლობის თემები და სამომავლო გეგმები, საქართველოს ევროატლანტიკური ინტეგრაციის პერსპექტივები და ვარშავის ნატოს სამიტის მოლოდინები განიხილეს.
ლატვიურმა მხარემ კიდევ ერთხელ გამოხატა მტკიცე მხარდაჭერა საქართველოს ევროპული და ევროატლანტიკური ინტეგრაციის მიმართ და აღნიშნა, რომ უელსის ნატოს სამიტზე საქართველოსთვის შემოთავაზებული ნატო-საქართველოს არსებითი პაკეტის განხორციელება ხელს უწყობს ნატო-საქართველოს ურთიერთობებს და საქართველო არის საიმედო პარტნიორი როგორც ნატოს, ისე ევროკავშირის ეგიდით მიმდინარე სამშვიდობო ოპერაციებში.

ორმხრივი ურთიერთობების კონტექსტში აღინიშნა, რომ ქვეყნებს შორის თანამშრომლობა ნაყოფიერად ვითარდება. საუბარი შეეხო რეგიონში არსებულ სიტუაციას და მთიან ყარაბაღში სამხედრო ესკალაციის თემას. ითქვა, რომ საქართველოსთვის ძალზედ მნიშვნელოვანია, დაპირისპირება არ გადაიზარდოს ფართომასშტაბიან სამხედრო ოპერაციებში და რეგიონში მშვიდობა შენარჩუნდეს.

ვიზიტის ფარგლებში ანა დოლიძემ მონაწილეობა მიიღო ლატვიაში საქართველოსა და ჩეხეთის საელჩოების მიერ ლატვიის ომის მუზეუმში მოწყობილი ერთობლივი ფოტოგამოფენის - „მისია მშვიდობისათვის“ გახსნის ოფიციალურ ცერემონიაში, რომელიც ავღანეთის სამშვიდობო მისიაში საქართველოსა და ჩეხეთის სამხედრო ძალების საქმიანობა ასახავს. საქართველოს თავდაცვის მინისტრის მოადგილე ფოტოგამოფენაზე სიტყვით გამოვიდა.

გამოფენის გახსნას დაესწრნენ ლატვიის საკანონმდებლო და აღმასრულებელი ხელისუფლების წარმომადგენლები, ლატვიაში აკრედიტებული დიპლომატიური კორპუსის წევრები, ასევე ქვეყანაში სამუშაო ვიზიტად მყოფი საქართველოს პარლამენტის აპარატის წარმომადგენლები.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

საქართველოს ბანკმა საერთაშორისო საბანკო ურთიერთობები Standard Chartered Bank-თან გააფართოვა

26 სექტემბრის ღამიდან 80 000-მდე აბონენტს წყალი 36 საათით შეუწყდება

თავდაცვის სამინისტროს კუთვნილი თანხის გაფლანგვისთვის მსჯავრდებულებმა ვასილ მხეიძემ და გიორგი ხაინდრავამ პენიტენციური დაწესებულება დატოვეს

თიბისი კაპიტალის მხარდაჭერით, რიკო ექსპრესმა $10 მილიონის ობლიგაციები გამოუშვა