კვირიკაშვილის მტკიცებით, საკონსტიტუციო სასამართლოს შესახებ კანონში შესული ცვლილებები სასამართლოს დამოუკიდებლობას განამტკიცებს

2016-05-14 21:31:38, 658 ნახვა

პოლიტიკა

საქართველოს პრემიერ-მინისტრ გიორგი კვირიკაშვილის მტკიცებით, ”საკონსტიტუციო სასამართლოს შესახებ” კანონში შესული ცვლილებები სასამართლოს დამოუკიდებლობას განამტკიცებს. ამის შესახებ პრემიერმა "იმედის" ეთერში განაცხადა.

მისი განცხადებით ცვლილებები უზრუნველყოფს იმას, რომ სასამართლოს გადაწყვეტილებებთან მიმართებაში ”გარედან ჩარევის მცდელობები აღიკვეთოს”.

”კამპანიის შედეგად მოვლენებს აჩვენებენ აბსოლუტურად საწინააღმდეგო მხრიდან. მე პირიქით ვიტყოდი - ეს ცვლილებები განამტკიცებს საკონსტიტუციო სასამართლოს დამოუკიდებლობას. ეს ცვლილებები გამორიცხავს იმას, რომ ერთ და ორ ადამიანზე გარედან გავლენის მოხდენით არ იყოს რაიმე მნიშვნელოვანი გადაწყვეტილება მიღებული. ამიტომ მოხდა კვორუმის აწევა, რომ გარედან ჩარევის მცდელობები აღიკვეთოს”, - განაცხადა პრემიერმა.

რაც შეეხება შეკითხვას, რატომ მოხდა ცვლილებების მიღება ვენეციის კომისიის დასკვნის გარეშე, გიორგი კვირიკაშვილმა აღნიშნულის მიზეზად საარჩევნო კამპანიის მოახლოება და ის გარემოება დაასახელა, რომ 8 ივნისიდან პარლამენტში დეპუტატები შესაძლოა ვეღარ იპოვონ.

”ვენეციის კომისიაში შეიძლება შემდეგ გაიგზავნოს. იქ გაგზავნის შემთხვევაში შეიძლება ამას ორი და სამი თვე დასჭირვებოდა. მოგეხსენებათ, რომ რამდენიმე კვირაში, 8 ივნისიდან იწყება საარჩევნო კამპანია და შეიძლება პარლამენტარი ვეღარ ვიპოვოთ ქუთაისში. ზუსტად ამიტომ იყო ახლა საჭირო ამის მიღება. ეს არის ძალიან პრინციპული ცვლილებები, რომლებიც, ვიმეორებ, გამორიცხავს, ერთ და ორ ადამიანზე გარედან ზეგავლენის მოხდენით პრინციპული გადაწყვეტილების მიღებას”, - განმარტა გიორგი კვირიკაშვილმა და დასძინა, რომ პარლამენტის მიერ დღეს მიღებული ცვლილებები საკონსტიტუციო სასამართლოს დამოუკიდებლობის ხარისხს ზრდის.

მთავრობის მეთაურს არ დაუმალავს, რომ აღნიშნული სასამართლოს მიერ ბოლო პერიოდში მიღებული გადაწყვეტილებები კითხვებს ბადებს.

”სამწუხაროდ, ბოლო პერიოდში ვნახეთ არა ერთი პოლიტიკური გადაწყვეტილება, რომელშიც ვხედავთ პოლიტიკური ზეგავლენის ნიშნებს ჩვენი ოპოზიციური პარტიების მხრიდან. მოგეხსენებათ, ის პიროვნებები, ვინც იქ მუშაობენ, დაინიშნენ წინა ადმინისტრაციის პერიოდში”, - აღნიშნა მთავრობის მეთაურმა.