ოკუპირებულ სამხრეთ ოსეთში ვადამდელი დე ფაქტო საპრეზიდენტო არჩევნები მიმდინარეობს. ისინი რუსეთის სახელმწიფო დუმის არჩევნებთან ერთად ტარდება.

საპრეზიდენტო არჩევნებში ოთხი კანდიდატი მონაწილეობს: მარატ კამბოლოვი (მოქმედი დე ფაქტო პრეზიდენტი); ზურაბ კოკოევი (ნომინირებულია პარტია „ერთიანობის“ მიერ); მურატ ვალიევი (პარტია „ალანიას პატრიოტები“); და ყაზბეკ კოდოევი (ნომინირებულია ამომრჩეველთა საინიციატივო ჯგუფის მიერ).

მარატ კამბოლოვი ამ რბოლაში ფავორიტად ითვლება - ის საინიციატივო ჯგუფმა წარადგინა, თუმცა მის კანდიდატურას მხარს უჭერენ რეგიონის წამყვანი პოლიტიკური პარტიები - „ერთიანი ოსეთი“, „ნიხასი“ და კომუნისტური პარტია. VTsIOM-ის მონაცემებით, კამბოლოვის მხარდაჭერა რეგიონში 79%-ს აღწევს.

პოლიტიკოსი ასევე კრემლის მფარველობით სარგებლობს. 2026 წლის 13 ივლისს ახლად დანიშნული კამბოლოვი მოსკოვში ვლადიმერ პუტინს შეხვდა. რუსეთის პრეზიდენტმა შემდეგ პირდაპირ განაცხადა: „ჩვენ ყველაფერს გავაკეთებთ თქვენს მხარდასაჭერად“.

აღსანიშნავია, რომ სამხრეთ ოსეთის „პრეზიდენტობის კანდიდატი“ რუსეთში დაიბადა და კარიერის უმეტესი ნაწილი იქ გაატარა. ის მუშაობდა რუსეთის ანტიმონოპოლიურ კომიტეტში, რეგიონული პოლიტიკის სამინისტროში და იყო კურჩატოვის ინსტიტუტის ეროვნული კვლევითი ცენტრის დირექტორი. მხოლოდ 2026 წლის მაისში დაინიშნა იგი „სამხრეთ ოსეთის პრეზიდენტის სახელმწიფო მრჩევლად“.

მიმდინარე არჩევნებისთვის ოკუპირებულ ცხინვალის რეგიონში სულ 70 საარჩევნო უბანი გაიხსნება, ერთი მოსკოვში და ოთხი ჩრდილოეთ ოსეთში.

მედიის ცნობით, არჩევნებს აკვირდებიან კიდევ ერთი ოკუპირებული ქართული რეგიონის, აფხაზეთის დამკვირვებლები.

ცხინვალში ვადამდელი არჩევნები დე ფაქტო პრეზიდენტის, ალან გაგლოევის, 2026 წლის 23 ივნისს გადადგომის შემდეგ დაინიშნა. ოფიციალური მიზეზი მისი რუსეთის პრეზიდენტის მრჩევლის თანამდებობაზე გადაყვანა იყო. ე.წ. პრემიერ-მინისტრი მარატ კამბოლოვი „პრეზიდენტის“ მოვალეობის შემსრულებლად დაინიშნა.

ავტორი: ელენე გვიმრაძე, ექსპრესნიუსის რეპორტიორი 2018 წლიდან

სოციალური ქსელები

უკრაინამ განაცხადა, რომ ზელენსკი მზადაა პუტინს ანტარქტიდაში შეხვდეს, მაგრამ არა მოსკოვში

კირცხალია ივანიშვილის წარმომადგენელთა სხდომაზე - განვიხილეთ ჩინეთთან ურთიერთობა და სხვა პოლიტიკური საკითხები

ღარიბაშვილი სხდომების დახურვაზე -ჩრდილოვანი მართლმსაჯულების მკაფიო მაგალითია

ბრალი წარედგინა მასწავლებელს, რომელიც 30 წლის წინ, 7 წლის დაზარალებულზე სექსუალურად ძალადობდა - საფარი