აშშ-ს კოლუმბიის ოლქის სასამართლომ ტანკერ Marinera-ს (ყოფილი Bella-1) 47 წლის ქართველ კაპიტანს, ავთანდილ კალანდაძეს, 10-თვიანი პატიმრობა და სასჯელის მოხდის შემდეგ ქვეყნიდან დეპორტაცია მიუსაჯა.

როგორც ოლქის პროკურატურის მიერ გავრცელებულ პრესრელიზშია აღნიშნული, 12 ივნისს კალანდაძემ ბრალი აღიარა აშშ-ის სანაპირო დაცვის კანონიერი მოთხოვნის შეუსრულებლობაში. მიუხედავად იმისა, რომ მას 5 წლამდე თავისუფლების აღკვეთა ემუქრებოდა, სასამართლომ უფრო მსუბუქი განაჩენი გამოიტანა. იმ შემთხვევაში, თუ პატიმრობის ვადის ათვლა დაკავების დღიდან — 7 იანვრიდან დაიწყება, კაპიტანი საპატიმროს, სავარაუდოდ, ოქტომბრის დასაწყისში დატოვებს.

ოლქის პროკურორმა ჯინინ პირომ განაცხადა, რომ კალანდაძე მეთაურობდა გემს, რომელიც აშშ-ის მოწინააღმდეგეებისთვის ნავთობის უკანონო გადაზიდვების დასაფარად გამოიყენებოდა, ხოლო სანაპირო დაცვის მოთხოვნის მიუხედავად, მან გაქცევა სცადა. „ეს საქმე მოწმობს, რომ ის პირებიც აგებენ პასუხს, რომლებიც აშშ-ის სამართალდამცავებისგან თავის არიდებას ღია ზღვაში შეეცდებიან. ოკეანე ვერავის მოაქცევს ჩვენი წვდომის მიღმა“, — აღნიშნა პროკურორმა.

აშშ-მა ტანკერ Bella 1-ს სანქციები ჯერ კიდევ 2024 წელს დაუწესა, როგორც „ჩრდილოვანი ფლოტის” გემს, რომელსაც ირანიდან და ვენესუელიდან უკანონოდ გადაჰქონდა ნავთობი.

რუსეთის ტრანსპორტის სამინისტრომ თავის დროზე განაცხადა, რომ Marinera-ს რუსეთის დროშით ცურვის დროებითი ნებართვა ჰქონდა და დაკავება ღია ზღვაში თავისუფალი ნაოსნობის რეჟიმის დარღვევით მოხდა. თუმცა, აშშ-ის გენერალური პროკურორის, პემ ბონდისა და ამერიკული მართლმსაჯულების პოზიციით, საერთაშორისო სანქციების გვერდის ავლით მოქმედი „ჩრდილოვანი ფლოტის“ მართვა სისხლისსამართლებრივ პასუხისმგებლობას დაქვემდებარებული დანაშაულია.

ავტორი: გიორგი ბაზაევი, ექსპრესნიუსის რეპორტიორი 2010 წლიდან

სოციალური ქსელები

ანგარიშის თანახმად, ევროკავშირი საკმარისად სწრაფად და ეფექტურად არ აშენებს თავის თავდაცვით შესაძლებლობებს

მაკრონმა ტრამპი გააფრთხილა, რომ აშშ-ის ნავთობის ექსპორტის შეჩერება ფასების ზრდას გამოიწვევდა.

ზელენსკიმ განაცხადა, რომ „ანკორიჯის შეთანხმებები“ მოლაპარაკებებში აღარ განიხილება

ევროკავშირი სანქციებსა და ვიზების შეზღუდვებს ამზადებს, რათა რუსებმა გლობალურ სპორტში დაბრუნება ვერ შეძლონ