სადავო პარლამენტის თავმჯდომარის, შალვა პაპუაშვილის განცხადებით, ცვლილებები შედის პარლამენტში მედიის აკრედიტაციის წესში. როგორც მან დღეს, 8 ივნისს, მედიისთვის გამართულ ბრიფინგზე განაცხადა, ცვლილებები შეეხება როგორც ინდივიდუალურად ჟურნალისტებს, ასევე მთლიანად მედიასაშუალებებს.

პაპუაშვილის განმარტებით, თუ არსებული წესის მიხედვით ჟურნალისტის მხრიდან აკრედიტაციის წესების დარღვევა პირველ ჯერზე 1 თვით აკრედიტაციის შეჩერებას, განმეორების შემთხვევაში კი 6 თვით შეჩერებას ითვალისწინებდა, ცვლილების თანახმად, პირველ ჯერზე ჟურნალისტს აკრედიტაცია 1 თვით, ხოლო განმეორების შემთხვევაში 1 წლამდე ვადით შეიძლება შეუჩერდეს.

"დარღვევის სიმძიმის და სიხშირის გათვალისწინებით, შესაძლებელი იქნება, რომ გაუუქმდეს მთლიანად მედიას აკრედიტაცია ერთ წლამდე ვადით", - თქვა შალვა პაპუაშვილმა.

შალვა პაპუაშვილის თანახმად, ცვლილების საფუძველია ის, რომ "საქართველოს პარლამენტის აკრედიტაციის სისტემა ევროპულ სისტემასთან" დაახლოვდეს.

„როგორც იცით, თავის დროზე, ევროპარლამენტის მიერ მიღებული გარკვეული გადაწყვეტილებების დროს, მე ვთქვი კიდევაც, რომ ჩვენ შევისწავლიდით ევროპარლამენტში არსებულ აკრედიტაციის სისტემას და იყო რაღაც გარკვეული საკითხები, რომლებიც საინტერესო იყო, რომ გადმოგვეღო საქართველოს პარლამენტში და ამ მხრივ დაგვეახლოებინა საქართველოს პარლამენტის აკრედიტაციის სისტემა ევროპულ სისტემასთან", - თქვა შალვა პაპუაშვილმა.

მისი განმარტებით, ჯერჯერობით არ შემოიღებენ დეპუტატებთან ინტერვიუს წინასწარი შეთანხმების წესს.

"ჩვენ ვიხილეთ ევროპარლამენტის ბოლო ინციდენტის დროს, იყო მითითება, რომ წინასწარი თანხმობა არ ჰქონდა აღებული ჟურნალისტს ინტერვიუსთვის. ჩვენ წინასწარი თანხმობის საჭიროება არ გვაქვს დღემდე და ამ მხრივ ამას არ გადმოვიღებთ ევროპარლამენტისგან, რომ იყოს წინასწარი თანხმობა საჭირო პარლამენტის წევრისგან, რომ მასთან დაიწყოს ინტერვიუ. ამიტომ ევროპარლამენტის ამ მკაცრ მიდგომას ჯერჯერობით, ყოველ შემთხვევაში, საქართველოს პარლამენტის აკრედიტაციის სისტემაში, არ გადმოვიღებთ“, - განაცხადა პაპუაშვილმა.

პირობა, რომ პარლამენტში მედიის აკრედიტაციის წესებს გადახედავდა ევროპული სტანდარტის შესაბამისად, შალვა პაპუაშვილმა მაისში გაახმაურა, ბრიტანეთის მიერ დასანქცირებული პროსახელისუფლებო ტელეკომპანია "იმედის" განცხადების კვალდაკვალ, რომ ერთი წლით აეკრძალათ ევროპარლამენტში საქმიანობა.

ავტორი: ექსპრესნიუსი,

სოციალური ქსელები

რომის პაპი ჟურნალისტებს - მიხარია, რომ აქ ხართ, კარგი გაშუქება ყველგან და ყველასთვის მნიშვნელოვანია

თიბისი კონცეპტის მხარდაჭერით ამირ კაკაბაძის საიუბილეო წიგნი გამოიცა

Transparency International Georgia - მიხეილ სააკაშვილის სახელი შეტანილი იქნება ჩვენი ორგანიზაციის მიერ შედგენილი პოლიტიკური პატიმრების სიაში

რუსეთი სამშენებლო კომპანიების გაკოტრების ტალღამ მოიცვა