ქართული ოცნება" რეპრესიების ხელოვნებას უფრო და უფრო ხვეწს. რეჟიმი გამოდის ინიციატივით, რომ პარლამენტმა ხელისუფლების არაღიარების კრიმინალიზების კანონი რაც შეიძლება მალე მიიღოს. 

ხალხს, არ უნდა "ქართული ოცნების" რუსული რეჟიმი თუმცა, ოლიგარქ ივანიშვილის გუნდი აპირებს მოსახლეობას მისი ლეგიტიმურობა ძალის გამოყენებით და ხელების გადაგრეხვით დააძალოს. არალეგიტიმური რეჟიმი ცდილობს კანონით დასაჯოს ხალხი ვინც მათ არ აღიარებთ, მათ შორის ციხეებში გამოკეტვით.

„ქართული ოცნება“ განიხილავს, შემოიღოს სისხლის სამართლის პასუხისმგებლობა იმ მოქალაქეების წინააღმდეგ, რომლებიც „საჯაროდ არ აღიარებენ კონსტიტუციური ორგანოების ლეგიტიმაციას“ და სხვებსაც მოუწოდებენ ამისკენ.

ინიციატივის ავტორია “ქართული ოცნების“ დეპუტატი ლევან მაჭავარიანი. 3 თებერვალს მან პარლამენტში განაცხადა, რომ სისხლისსამართლებრივი პასუხისმგებლობა უნდა დაწესდეს იმ პირებისთვის, რომლებიც:

• არ აღიარებენ არჩეული ხელისუფლების ლეგიტიმაციას;
• ამტკიცებენ, რომ ქვეყანა ოკუპანტი ძალის მიერ იმართება;
• და ამ პოზიციების გავრცელებისკენ სხვებსაც მოუწოდებენ.

იდეა გაჟღერდა პლენარულ სხდომაზე, სადაც მაჭავარიანმა ამ საკითხზე კიდევ ერთ “ქართული ოცნების” დეპუტატს, არჩილ გორდულაძეს მიმართა “უცხოური გრანტების“ შესახებ კანონპროექტის პირველი მოსმენით განხილვისას.

ირაკლი კობახიძეს სურს , პარლამენტმა ხელისუფლების არაღიარების კრიმინალიზების კანონი რაც შეიძლება მალე მიიღოს. დღეს "ოცნების" პრემიერმა თქვა, რომ ეს მისი სურვილია, დანარჩენი კი პარლამენტის გადასაწყვეტია. 

„რაც შეეხება არაღიარების თემას, ჩვენ გვაქვს ჩვენი კონსტიტუციური ინტერესი, რომ დაცული იყოს კონსტიტუციური სისტემა. თუ ამ კუთხით არის გამოწვევები, ბუნებრივია, კანონმდებლობამ უნდა იზრუნოს შესაბამისი პრობლემების მოგვარებაზე და, ამ კუთხით, მე მოვუწოდებდი საქართველოს პარლამენტს, რომ მიიღოს შესაბამისი კანონი, რომელიც ამ პრობლემას დაუპირისპირდება. ეს არის მნიშვნელოვანი იმისათვის, რომ საქართველოში სათანადოდ ფუნქციონირებდეს კონსტიტუციური სისტემა. ჩემი სურვილი იქნებოდა, რომ პარლამენტმა რაც შეიძლება მალე მიიღოს ეს კანონი, დანარჩენი არის პარლამენტის გადასაწყვეტი“,- განაცხადა კობახიძემ.

კონსტიტუციონალისტი ვახუშტი მენაბდე, "ოცნების" მორის რეპრესიულ ინიციატივას კონსტიტუციასთან შეუსაბამოდ მიიჩნევს.

რეჟიმის (ამ სიტყვის გამოყენება დასჯადიც კი შეიძლება იყოს) პარლამენტი მსჯელობს სანქციების დაკისრებაზე იმ პოლიტიკური ჯგუფებისთვის, რომლებიც ქართული ოცნების ხელისუფლების ლეგიტიმურობას არ აღიარებენ.

ანალოგად მოჰყავთ გერმანია. შინაგან საქმეთა სამინისტრომ 2024 წელს აკრძალა Reichsbürgerbewegung-ში (რაიხის/იმპერიის მოქალაქეთა მოძრაობა) შემავალი რამდენიმე ორგანიზაცია. გასათვალისწინებელია, რომ ეს ორგანიზაციები არ იყვნენ პარტიები, რადგან პარტიების ასაკრძალად სხვა პროცედურა გამოიყენება და იქ გადაწყვეტილებას საკონსტიტუციო სასამართლო იღებს.

როგორც სხვა შემთხვევაში, ქართული ოცნება აქაც მანიპულირებს და ფაქტების დამახინჯებით ცდილობს გერმანული შემთხვევა საქართველოს კონტექსტს მოარგოს.

Reichsbürgerbewegung-ის საქმეში ორგანიზაციების აკრძალვის მიზეზი სამი იყო:

I. კონსტიტუციური წესრიგის უარყოფა;

II. სახელმწიფო სუვერენიტეტის ხელყოფა („პარალელური სახელმწიფოს“ შექმნა);

III. ძალადობის რეალური საფრთხე (სახელმწიფო გადატრიალების გეგმები, 2022 წელს გამოვლინდა ტერორისტული შეთქმულება);

IV. ანტისემიტური და ექსტრემისტული შინაარსი;

V. სახელმწიფო ინსტიტუტების საბოტაჟი.

ასე ჩამოთვლილი ეს მიზეზები მარტივად ჟღერს, მაგრამ თითოეულს აქვს თავისი ტესტი, რომელიც კონკრეტულმა საქმემ უნდა დააკმაყოფილოს იმისთვის, რომ ორგანიზაცია აკრძალოს.

მაგალითად, I მიზეზის შემთხვევაში სახელმწიფომ საჭიროა დაასაბუთოს, რომ ერთდროულად 3 ფაქტორია წარმოდგენილი:

1. არსებობს ორგანიზებული გაერთიანება;

2. მას სურს კონსტიტუციის გაუქმება/ჩანაცვლება;

3. ის დგამს ქმედით ნაბიჯებს ამისთვის (აქვს სტრატეგია, პროგრამა, მოქმედებს სისტემურად).

თავად „კონსტიტუციური წესრიგის უარყოფა“ კი ნიშნავს (აქაც ერთდროულად უნდა იყოს ეს ფაქტორიები მოცემული) არა მთავრობის ან იმ არჩევნების, რომლითაც კონკრეტული მთავრობა აირჩა, არალეგიტიმურობაზე საუბარს, არამედ:

1. თავად სახელმწიფოს ლეგიტიმურობის უარყოფას (გერმანიის შემთხვევაში ეს ჯგუფი მიიჩნევდა, რომ გდფ არალეგიტიმური ქვეყანაა და აღიარებდა მხოლოდ რაიხის პერიოდის გერმანიას, ანუ სხვა სახელმწიფოს. ჩვენს შემთხვევაში ქართლ-კახეთის სამეფოს რომ აღიარებდეს ვინმე, ან საქართველოს საბჭოთა სოციალისტური რესპუბლიკას);

2. მოქმედი კონსტიტუციის არაღიარებას;

3. ისეთი დემოკრატიული ინსტიტუტების უარყოფა როგორიცაა არჩევნების, სასამართლო და ა.შ. ოღონდ ეს უნდა იყოს დემოკრატიული ინსტიტუტების უარყოფა ზოგადად და არა კონკრეტული არჩევნების, მოსამართლის, სასამართლოს მიმართ უნდობლობა.

ჩვენთან საქმე სულ პირიქითაა. წინააღმდეგობა:

1. ერთგულებს არსებული ქართული სახელმწიფოს ინტერესებს და რეჟიმს მოქმედი, მე-2 რესპუბლიკის ღირებულებების ღალატში ადანაშაულებს - არალეგიტიმურად აღიარებს კონკრეტულ მთავრობას;

2. იცავს მოქმედ, 1995 წლის კონსტიტუციას (თავისი ყველა, ოცნების მიერ შეტანილი ცვლილები ჩათვლით) და ოცნებას მის დარღვევაში ადანაშაულებს (სავსებით გამართული ლოგიკით);

3. მოითხოვს ავტორიტარული ხელისუფლების მიერ მიტაცებული დემოკრატიული ინსტიტუტები ხალხისთვის დაბრუნებას და ბრალს დებს უზურპატორებს მის ინსტრუმენტალიზაციაში.

როგორც ხედავთ, საქართველოს შემთხვევაში ყველაფერი პირიქითაა და გერმანიის შემთხვევა საერთოდ არაფერ შუაშია ჩვენთან. იქ აკრძალული ორგანიზაციები დემოკრატიას უპირსპირდებოდნენ, აქ - წინააღმდეგობა დემოკრატიისთვის იბრძვის.

5-დან მხოლოდ 1, რეჟიმის მიერ ყველაზე ხშირად მოყვანილი, არგუმენტი განვიხილე. დანარჩენ 4-ზეც რომ მესაუბრა არავინ წაიკითხავდა იმსიგრძე პოსტი გამოვიდოდა. აცხადებს მენაბდე.

"ოცნება" ადამიანებს ეუბნება, თუ არ გვაღიარებთ, ციხეში ჩაგსვამთო - ასე ეხმაურება კოალიცია "ცვლილებისთვის" ერთ-ერთი ლიდერი, ზურა ჯაფარიძე.

ჯაფარიძის თქმით, "ოცნება" იმით, რომ საკუთარ მოქალაქეებს კანონის ძალით ავალებს აღიარებს, თავად აღიარებს, რომ მათ ლეგიტიმურობას არც ქვეყნის შიგნით და არც ქვეყნის გარეთ არ ცნობენ.

ჰარვარდის დოქტორანტურის დამთავრება არ სჭირდება ნებისმიერი ადამიანისთვის იმის გააზრებას, რომ არ არსებობს სამყაროში იმაზე უფრო სერიოზული მტკიცებულება მათი არაღიარების და არალეგიტიმურობის, ვიდრე ის, რომ  საკუთარ მოქალაქეებს კანონის ძალით ავალებენ, რომ ისინი აღიარონ. იმ ადამიანებს, რომლებიც კონსტიტუციით მათი ძალაუფლებსი წყარო არიან, რომ თუ არ გვაღიარებთ, ციხეში ჩაგსვამთო. მე რამდენიც არ უნდა ვილაპარაკო, როგორ შეიძლება მაგაზე უფრო წონიანი მტკიცებულება დავდო, ვიდრე ის, რომ რომ მათ არ აღიარებენ არც ქვეყნის შიგნით და არც ქვეყნის გარეთ", - ამბობს ზურა ჯაფარიძე. 

"ძლიერი საქართველოს" ერთ-ერთი ლიდერი, გიორგი სიორიძე ამბობს, რომ ლეგიტიმაციის დაკანონება, რასაც ახლა "ოცნება" ცდილობს, მხოლოდ ავტორიტარულ სახელმწიფოებში შეიძლება მოხდეს. 

ლეგიტიმაციის კრიზისი აქვთ, მაგრამ ამის დაკანონება არის წარმოუდგენელი.  ეს ავტორიტარულ სახელმწიფოებში შეიძლება მხოლოდ მოხდეს. დემოკრატიულ სახელმწიფოებში ეს არის უბრალოდ კონსტიტუციური წესრიგის შემადგენელი ნაწილი, კონსტიტუციური უფლება, რომელიც აქვთ პოლიტიკურ პარტიებს, პოლიტიკოსებს და ადამიანებს. გავიხსენოთ პრეზიდენტი ტრამპი, რომელიც კითხვის ნიშნებს სვამდა არჩევნების სამართლიანობასა და გაყალბებაზე. როდესაც ჩვენ ამას ვამბობთ,  დიახაც ვართ კონსტიტუციის ერთგულები", - აცხადებს გიორგი სიორიძე. 

ოთხმა მსხვილმა ოპოზიციურმა გაერთიანებამ (4, 5, 9 და 25 საარჩევნო ნომრებით) გაყალბებულად მიიჩნია არჩევნები, რომლის ოფიციალური შედეგებითაც, პარლამენტში უმრავლესობა (89 მანდატი) „ქართულმა ოცნებამ“ შეინარჩუნა;

დაიწყო საპროტესტო აქციები, რომლებსაც დამატებითი იმპულსი შესძინა 2024 წლის 28 ნოემბერს „ქართული ოცნების“ მთავრობის მეთაურის, ირაკლი კობახიძის გადაწყვეტილებამ, „2028 წლამდე“ დღის წესრიგში აღარ დამდგარიყო ევროკავშირში გასაწევრებლად მოლაპარაკებების გახსნის საკითხი. აქციებს რამდენიმე დღის განმავლობაში არბევდნენ.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

გვარაკიძე: კვლავ მკაცრი იყო პროკურატურის პოლიტიკა ოჯახურ დანაშაულზე, ყველას პატიმრობას ვითხოვდით

საქმე ეხება ფსიქოტროპული წამლებით უკანონო ვაჭრობას - დაკავებულია 17 პირი

რუსეთის კიდევ შვიდ რეგიონში ბენზინის გაყიდვებზე შეზღუდვები დაწესდა

კარაფანო: ივანიშვილისთვის დაწესებული სანქციები დაპირებებით არ მოიხსნება, ბურთი "ოცნების" მოედანზეა