"ასეთ კარგ ბედში ჩავარდნილი ხე   სხვა არ მეგულება საქართველოში", - ამის შესახებ ახალი პოლიტიკური ცენტრის – "გირჩის”  ერთ-ერთმა ლიდერმა გოგა ხაჩიძემ "ექსპრესნიუსს" ასწლოვანი ხის გადატანის მიზნით, ურეკის სანაპიროსთან მძიმე ტექნიკის მიერ მიმდინარე სამუშაოებთან დაკავშირებით განუცხადა.

გოგა ხაჩიძის შეფასებით, ქვეყანაში სხვა ბევრად  მნიშვნელოვანი პრობლემებია და საზოგადოებამ ყურადღება მათზე უნდა გაამახვილოს:

"მე თვითონ ამ ხის მოგზაურობაში, ხის ცხოვრებაში ქვეყნისთვის დიდ ტრაგედიას ვერ ვხედავ,  ტრაგედია გაცილებით სხვა რამეა.  უბრალოდ, ეს ისეთი  სიმბოლური ამბავი ხდება. ჩემი აზრით, ხდება ძალიან საინტერესო ამბავი, ასეთი ამბავი ჩვენს ქვეყანაში დიდხანს არ მოხდება, რომ არ გვყავდეს ასეთი მილიარდელი ადამიანი ბიძინა ივანიშვილი, რომელსაც შეუძლია ასეთი რაღაცის გაკეთება. იმ კონტექსტში, რა საჭიროა, რისთვის უნდა, რა ახირება აქვს, რატომ ამოგზაურებს ამ ხეს, ეს სხვა თემაა, მაგრამ შეიძლება ამ ამბავს შეხედო, როგორც საინტერესო ამბავს. ეს არ არის ყველაზე დიდი უბედურება ახლა, რაც ქვეყანაში ხდება. მეტსაც გეტყვით, ასეთ კარგ ბედში ჩავარდნილი ხე   სხვა არ მეგულება საქათველოში. გარემოს დაცვის მინისტრი ვიყავი და ერთ ხეზე ამის ალბათ მეათასედი  ფულიც არ დაგვიხარჯავს არასოდეს სახელმწიფოს. ასეც ხომ შეიძლება ამ ყველაფერს შეხედო. ადამიანი თავისი კერძო ფულით "საერთაშორისო მასშტაბის ოპერაციას" აკეთებს,  რომელიც თავისთავად ცოტა სამხიარულოც არის, ცოტა ტრაგიკულიც,  ცოტა საინტერესოც და ცოტა- უნიკალური.  ვფიქრობ,  საზოგადოებამ ხე ვაქციეთ  ტომარაში ჩადებულ კატად, ჩამოვკიდეთ და მივჩერებივართ, როცა მართლა რეალური  პრობლემებია. ხე არ არის ახლა ყველაზე დიდი პრობლემა, არც მეათე და არც მეოცე პრობლემა. არაფორმალური მმართველობა გავაპროტესტოთ, სხვა რამე გავაპროტესტოთ, მაგის დრო გავქვს ახლა?!", - განაცხადა გოგა ხაჩიძემ "ექსპრესნიუსთან" საუბარში.

შეგახსენებთ, ციხისძირიდან ასწლოვანი ხე გურიაში ორი დღის წინ წაიღეს. 150-მეტრიანი მანძილის დაფარვას სპეცტექნიკამ ორი საათი მოანდომა.  ახლა კი, ურეკის სანაპიროსთან მძიმე ტექნიკაა მობილიზებული, რომელიც ხის გადატანის მიზნით, ზღვის ფსკერს თხრის. 

მსგავსი სიდიდის ხის გადარგვა საქართველოში პირველად ხორციელდება. ასწლოვანი ხე ყოფილი პრემიერმინისტრის, ბიძინა ივანიშვილის  დენდროლოგიურ პარკში გადაირგვება.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ტრამპი: ვინმეს სერიოზულად სჯერა, რომ ეს „არჩევნები“ სამართლიანი იყო?

კრაკოვში თავდამსხმელი საავადმყოფოში გარდაიცვალა

საქართველოს ბანკის მხარდაჭერით წინანდლის მამულში რიგით მეოთხე ღვინის სიმპოზიუმი გაიმართა

არ გაჩერების კულტურა კალათბურთში - საქართველოს ბანკი კალათბურთის ეროვნული ნაკრების გენერალური სპონსორია