ათასობით ადამიანის პროტესტი რეჟიმის წინააღმდეგ და მთავარი განცხადებები

2025-11-28 22:16:02, 8866 ნახვა

ათასობით ადამიანის პროტესტი რეჟიმის წინააღმდეგ და მთავარი განცხადებები - ვიდეო

რუსთაველის გამზირზე, პარლამენტის წინ, უწყვეტი პროტესტის დაწყებიდან ერთი წლის თავზე საპროტესტო აქცია მიმდინარეობს.

საკანონმდებლო ორგანოსთან მიმდინარე აქციას საზოგადოებრივი მაუწყებლისა და თბილისის სახელმწიფო უნივერსიტეტის ტერიტორიებიდან საპროტესტო მარშები შეუერთდნენ. რუსთაველის გამზირი გადაკეტილია.

დემონსტრანტებს მოტანილი აქვთ სხვადასხვა შინაარსის ბანერები: "გადადგეს რეჟიმი", "თავისუფლება რეჟიმის ტყვეებს" და ა.შ.

მარშების გამოჩენას მოქალაქეებში ოვაციები და შეძახილი მოჰყვა.

"ბოლომდე, ბოლომდე", - სკანდირებენ აქციის მონაწილეები.

მოქალაქეებმა რუსთაველის გამზირზე ბიძინა ივანიშვილის, ირაკლი კობახიძის, ვლადიმერ პუტინისა და კრემლის ფოტოები დაწვეს.

პერფორმანსი თბილისში მცხოვრებმა აზერბაიჯანელმა ჟურნალისტმა, აფგან სადიგოვმა ჩაატარა.

გზა არის ერთი, იმისთვის, რომ საქართველოს დამოუკიდებლობა გადარჩეს, რეჟიმი უნდა გადადგეს, იმისთვის, რომ ქართველობა, ქართული ანუ ევროპული იდენტობა შევინარჩუინოთ, რეჟიმი უნდა გადადგეს, – ამის შესახებ პარტია „ფედერალისტების“ ლიდერმა თამარ ჩერგოლეიშვილმა რუსთაველზე მიმდინარე აქციაზე სიტყვით გამოსვლისას განაცხადა.

ჩერგოლეიშვილის თქმით, „რეჟიმი გადადგება მაშინ, როდესაც ქართველი ხალხი სხვა გზას არ დაუტოვებს“.

„იმისთვის, რომ ძალა დავიბრუნოთ და თავისუფალი არჩევნები ჩავატაროთ, რეჟიმი უნდა გადადგეს. იმისთვის, რომ სამართლიანობა დამყარდეს, პოლიტიკური დევნა და სინდისზე ძალადობა შეწყდეს, რეჟიმი უნდა გადადგეს. იმისთვის, რომ ჩვენმა შვილებმა მიიღონ განათლება, ჩვენ და ჩვენს მშობლებს გვქონდეს ღირსეული სიბერე, რეჟიმი უნდა გადადგეს. ბიძინა ივანიშვილი თავისი ნებით ძალაუფლებას არ დათმობს, რეჟიმი თავისით არ გადადგება. რეჟიმი გადადგება მაშინ, როდესაც ქართველი ხალხი სხვა გზას არ დაუტოვებს. სხვა გზა რეჟიმს არ დარჩება მაშინ, როდესაც ყველა გზა და ქუჩა საქართველოში ზუსტად ისე გაივსება, როგორც დღეს რუსთაველი გავავსეთ. იმისთვის, რომ ცვლილების ჟინი ვირუსივით მოედოს მთელ საქართველოს, საჭიროა, ჩვენ, პოლიტიკურმა სპექტრმა ჩვენს დღის წესრიგში საქართველოს თითოეულ მოქალაქეს თავისი და თავისი ოჯახის ინტერესები დავანახოთ. მათ შორის მათ, ვინც დღეს სტატუს-კვოშია ჩაძირული, რადგან არ იცის, რომ იღუპება. ეს ჩვენი დანაშაულია, პოლიტიკური სპექტრის, რომ აქამდე ვერ ვქენით, მაგრამ როგორც არასდროს, ისე დღეს მაქვს რწმენა, რომ ჩვენ ამას შევძლებთ ისევ და ისევ იმიტომ, რომ თქვენ სხვა გზა არ დაგვიტოვეთ. ასე რომ, თქვენ გაგიმარჯოთ, თავისუფალ საქართველოს გაუმარჯოს. თავისუფლება პოლიტიკურ პატიმრებს და გადადგეს რეჟიმი“, – განაცხადა ჩერგოლეიშვილმა.

ვთხოვეთ მოქალაქეებს, ვისაც სურვილი აქვთ, ლუსტრაციის კანონს მხარი დაუჭირონ და ჩვენს პეტიციას ხელი მოაწერონ, – ამის შესახებ პარტია „თავისუფლების მოედნის“ ლიდერმა, ლევან ცუცქირიძემ განაცხადა.

მისივე თქმით, პეტიცია პარტია „თავისუფლების მოედანმა“ შეიმუშავა.

„ვიდრე ეს დიდი მსვლელობა დაიწყება, იმ ადამიანების ხელმოწერებს ვაგროვებთ, რომლებიც ლუსტრაციის კანონის მიღებას მხარს უჭერენ. ლუსტრაციის კანონი მიმართულია, რომ არც „კაგებეს“ აგენტები და არც მისი მემკვიდრე ორგანიზაციების წარმომადგენლები სახელმწიფო მმართველობაში აღარ დავუშვათ. ვთხოვეთ მოქალაქეებს, ვისაც სურვილი აქვთ, ამას მხარი დაუჭირონ, ჩვენს პეტიციას ხელი მოაწერონ. ეს არის ლუსტრაციის კანონის მხარდაჭერის პეტიცია. ჩვენი პროექტი, კარგა ხანია, ონლაინაც არის გამოქვეყნებული, ნებისმიერ ადამიანს შეუძლია, გაეცნოს და მის განხილვაში მონაწილეობა მიიღოს“, – განაცხადა ცუცქირიძემ.

ნანკა კალატოზიშვილმა აღნიშნა, რომ დღეს, საქართველოში, პოლიციელებს პატივი აყარეს და სურვილი გამოთქვა, რომ პოლიცია იყოს თავისუფალი.

რეჟიმის ტყვეა ქართული პოლიცია. ძალიან მინდა ის სლოგანი რომელიც აქვთ და რომლითაც ატყუებენ, რომ "პოლიციელი გმირია", რეალურად პოლიციელი იყოს გმირი და იყოს სამართალდამცავი. დღეს, საქართველოში, მათ [პოლიციელებს] პატივი აყარეს, საერთოდ ღირსების ცნებაც ალბათ აღარ არსებობს პოლიციაში, ტიტუშკების მომსახურე პერსონალად აქციეს, აქციეს ადამიანებად, რომლებიც პირბადეს ლუქავენ და მე მინდა, რომ პოლიცია იყოს თავისუფალი, რომელსაც გააჩნია ხმა, რომელიც თავად შეწუხდება ასეთი ამორალობით და პირველ რიგში თავად გააპროტესტებს მასზე ასეთ ძალადობას, ამ ხალხის ხელით. ამიტომ თავისუფლება რეჟიმის ტყვე ქართულ პოლიციელებს, ნამდვილ პოლიციელებს," - თქვა ნანკა კალატოზიშვილმა.

"ოცნებას" უფსკრულის პირას მიყავართ, - ასეთია მხატვარ ნიკო ცეცხლაძის შეფასება.

ვარ ბედნიერი, დღეს კიდევ ერთხელ დაამტკიცა ხალხმა, რამდენნი ვართ. ამ ადამიანებს უნდათ პრორესი, ცივილიზაცია და დასავლური მომავალი და გამოვიდნენ და აპროტესტებენ. ზუსტად ეს არის და მე ვარ დარწმუნებული, კიდევ უფრო ბევრი გამოვა. რაც დროზე გონს მოეგებიან, ეს მათთვისაც უკეთესი იქნება. უფსკრულის პირას მივყავართ. ყოველდღიურად რაღაც გაურკვეველი კანონები, რა ხდება, მართლა ვერ გავიგე... სიმართლე და სინათლე ჩვენს მხარესაა, - ამბობს ნიკო ცეცხლაძე.

მოქალაქეების მოთხოვნები დღესაც უცვლელია: ახალი საპარლამენტო არჩევნები და სინდისის და პოლიტპატიმრების გათავისუფლება. აქციის მონაწილეები პირდაპირ ამბობენ, რომ მათი მთავარი ძალა ერთიანობაა და ეს ბრძოლა აუცილებლად მათი გამარჯვებით დასრულდება.