2023-11-07 10:10:49, 770 ნახვა

---

ოკუპირებული ცხინვალის ე.წ. უსაფრთხოების სამსახური - საზღვრის დამრღვევები ნასვამები იყვნენ, დაკავებისას მესაზღვრეებს წინააღმდეგობა გაუწიეს

დროებით ოკუპირებული ცხინვალის ე.წ. უსაფრთხოების სამსახური გორის მუნიციპალიტეტის სოფელ კირბალის მიმდებარედ რუსეთის საოკუპაციო ძალების მიერ საქართველოს მოქალაქის მკვლელობასთან დაკავშირებით განცხადებას ავრცელებს.

КГБ-ს მტკიცებით, ე.წ. საზღვრის დამრღვევები ნასვამ მდგომარეობაში იმყოფებოდნენ და დაკავებისას მესაზღვრეებს წინააღმდეგობა გაუწიეს.

"დაკავების მცდელობისას მათ წინააღმდეგობა გაუწიეს მესაზღვრებს, რაც საფრთხეს უქმნიდა მესაზღვრეების სიცოცხლესა და ჯანმრთელობას. საზღვრის დამრღვევებმა ნაჯახი გამოიყენეს, მოგვიანებით კი, სცადეს, მესაზღვრეს მანქანით შეჯახებოდნენ და შემდეგ საქართველოში გამგზავრებულიყვნენ.

ამ უკანონო ქმედებების აღსაკვეთად და "სამხრეთ ოსეთის რესპუბლიკის" სახელმწიფო საზღვრის უკანონო გადაკვეთის თავიდან ასაცილებლად, მესაზღვრეებმა ჰაერში გამაფრთხილებელი გასროლა განახორციელეს, სამართალდამრღვევთა კანონიერი მოთხოვნების დაუმორჩილებლობის შემდეგ კი, მათი ავტომობილის საბურავებს ცეცხლი გაუხსნეს.

შედეგად, ერთ-ერთი მძიმედ დაიჭრა და გადაყვანილი იქნა საქართველოში სასწრაფო სამედიცინო დახმარებისთვის, მეორე კი დააკავეს. მომხდარ ფაქტზე გამოძიებას "სამხრეთ ოსეთის რესპუბლიკის" კომპეტენტური ორგანოები აწარმოებენ“,- ნათქვამია განცხადებაში. 

შეგახსენებთ, გუშინ, 6 ნოემბერს გორის მუნიციპალიტეტის სოფელ კირბალის მიმდებარედ, ოკუპირებულ ტერიტორიაზე, რუსეთის საოკუპაციო ძალების წარმომადგენლებმა საქართველოს მოქალაქე თამაზ გინტური მოკლეს და ლევან დოთიაშვილი გაიტაცეს.

საქართველოს სახელმწიფო უსაფრთხოების სამსახურის ოფიციალური ინფორმაციის თანახმად, "ადგილობრივი მცხოვრების უკანონოდ დაკავების მცდელობისას რუსეთის საოკუპაციო ძალების მიერ ცეცხლსასროლი იარაღით სროლის შედეგად გარდაიცვალა საქართველოს მოქალაქე და უკანონოდ დაკავებულ იქნა ერთი მოქალაქე". 

შინაგან საქმეთა სამინისტრომ საქართველოს მოქალაქის მკვლელობისა და ერთი პირის გატაცების ფაქტებთან დაკავშირებით გამოძიება 109-ე და 143-ე მუხლებით დაიწყო, რაც განზრახ მკვლელობასა და თავისუფლების უკანონო აღკვეთას გულისხმობს.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი