სარჯველაძე - რუსეთის ეს გადაწყვეტილება შეიძლება გამიზნული იყოს საიმისოდ, რომ საქართველოსა და EU-ს შორის ურთიერთობა დაიძაბოს

2023-05-12 14:13:18, 935 ნახვა

პოლიტიკა

შეიძლება რუსეთის მხრიდან ამ გადაწყვეტილების მიღება იყოს გამიზნული საიმისოდ, რომ რამენაირად ხელი შეეშალოს, საქართველოსა და ევროკავშირის ურთიერთობა დაიძაბოს,- ამის შესახებ "ქართული ოცნების" დეპუტატმა, მიხეილ სარჯველაძემ განაცხადა.

როგორც სარჯველაძემ მედიის წარმომადგენლებს პარლამენტში უთხრა, ეს არის კარგი გადაწყვეტილება იმ ადამიანებისთვის, ვისთვისაც ცხოვრების უკეთესი პირობების შექმნა შეუძლია.

"რა თქმა უნდა, აბსოლუტურად მართალია, რომ შეიძლება რუსეთის ფედერაციის მხრიდან ამ გადაწყვეტილების მიღება იყოს გამიზნული საიმისოდ, რომ რამენაირად ხელი შეეშალოს, საქართველოსა და ევროკავშირს შორის დაიძაბოს ურთიერთობა და ა.შ...

ეს კარგი გადაწყვეტილებაა იმ ადამიანებისთვის, ვისაც ეს ცხოვრების უკეთეს პირობებს შეუქმნის. რაც შეეხება საკითხის პოლიტიკურ მხარეს, მე მგონია, რომ აქ არავითარი მიზეზი არ არსებობს საქართველოს ხელისუფლებასთან მიმართებაში რამე ნეგტიური განცხადების გაკეთებისთვის",- ამბობს სარჯველაძე.

ცნობისთვის, 10 მაისს რუსეთის პრეზიდენტმა, ვლადიმერ პუტინმა რუსული ავიახაზებისთვის საქართველოსთან ფრენის აკრძალვა გააუქმა. საქართველოს მოქალაქეებისთვის ასევე გაუქმდა სავიზო რეჟიმი. ოფიციალურ პორტალზე გამოქვეყნებული განკარგულების თანახმად, გადაწყვეტილება ძალაში 2023 წლის 15 მაისიდან შევა. კიდევ ერთი გადაწყვეტილება, რომლის შესახებაც რუსეთმა გუშინ განაცხადა, „საქართველოში მოგზაურობისგან თავის შეკავების რეკომენდაციის“ გაუქმებას ეხება.