თავის ანგარიშში, სახელწოდებით „დეზინფორმაციული დიპლომატია: როგორ ცდილობენ ბოროტი აქტორები დემოკრატიის შელახვას“, დიდი ბრიტანეთის საგარეო საქმეთა კომიტეტი კრიტიკულად აფასებს საქართველოში მიმდინარე მოვლენებს.

დოკუმენტში განხილულია დემოკრატიული უკუსვლა, ავტოკრატიული კონსოლიდაციის რისკები და დასავლური პოლიტიკისგან თავის დაღწევა. ბრიტანელი კანონმდებლები მოუწოდებენ მთავრობას, განიხილოს დამატებითი სანქციების დაწესება იმ პირების წინააღმდეგ, რომლებსაც ისინი ქვეყნის დემოკრატიული განვითარების შემაფერხებლად და დეზინფორმაციის გამავრცელებლად მიიჩნევენ.

ანგარიშის ცალკე თავი ეთმობა პარტია „ქართული ოცნების“ დამფუძნებელს, ბიძინა ივანიშვილს, სადაც აღნიშნულია, რომ მან ფინანსური კაპიტალი რუსეთში დააგროვა და საქართველოში პრორუსული ნარატივების გავრცელებაშია ჩართული.

„კომიტეტი ღრმა შეშფოთებას გამოთქვამს საქართველოში დემოკრატიის მუდმივი გაუარესების გამო, რამაც, ამჟამინდელი ტრაექტორიით, შეიძლება გამოიწვიოს მუდმივი ავტოკრატიის ჩამოყალიბება რუსეთის გავლენის სფეროში, ბელარუსის მსგავსად“. ანგარიში გმობს „ქართული ოცნების“ მთავრობის ქმედებებს, რომლებიც დაკავშირებულია ევროკავშირში გაწევრიანების მოლაპარაკებების შეჩერებასთან, ოპოზიციის რეპრესიებთან, ლეგიტიმური პროტესტების შეზღუდვასთან და დეზინფორმაციის გავრცელებასთან. ავტორების თქმით, ეს ქმედებები „რუსულ სცენარს“ იმეორებს და თბილისსა და მოსკოვს შორის კოორდინაციაზე მიუთითებს. „ანგარიში ასევე მხარს უჭერს დიდი ბრიტანეთის მთავრობის მიერ უკვე გადადგმულ ნაბიჯებს, რომლებიც კანონიერი საპროტესტო აქციების საპასუხოდ ადამიანის უფლებების დარღვევაში ჩართული ქართველი თანამდებობის პირების მიმართ სანქციებს ითვალისწინებს“, - ნათქვამია დოკუმენტში.

ანგარიში ასევე იძლევა კონკრეტულ რეკომენდაციებს, რომლებიც ხაზს უსვამს დამატებითი ზომების საჭიროებას. კერძოდ, იგი გვთავაზობს მიზნობრივი ფინანსური და სავიზო სანქციების გაფართოებას იმ პირებისა და ორგანიზაციების მიმართ, რომლებიც, ავტორების აზრით, ხელს უწყობენ დეზინფორმაციის გავრცელებას და ასუსტებენ ქვეყნის ევროპულ პოზიციას.

„მოვუწოდებთ მთავრობას, დააწესოს ახალი მიზნობრივი ფინანსური და სავიზო სანქციები „ქართული ოცნების“ იმ თანამდებობის პირების მიმართ, რომლებიც მხარს უჭერენ „უცხოელი აგენტების“ კანონს, ქართველი კლეპტოკრატების და დეზინფორმაციის გამავრცელებელი ქართული მედიაორგანიზაციების მიმართ. ეს დამატებითი სანქციები მნიშვნელოვნად გაზრდის იმ პირთა ხარჯებს, რომლებიც ცდილობენ ძირი გამოუთხარონ ქართველი ხალხის ევროპული კურსისკენ სწრაფვას და გააგზავნის ძლიერ სიგნალს, რომ დიდი ბრიტანეთი მხარს უჭერს დემოკრატიას საქართველოში და არა ავტოკრატიას“, - ნათქვამია ანგარიშში.

აღნიშნულია, რომ ბრიტანელი პარლამენტარები საქართველოში მიმდინარე მოვლენების ანალიზისას ეყრდნობიან საერთაშორისო და სამართლებრივ დოკუმენტებს, მათ შორის ევროპარლამენტის რეზოლუციებს, ეუთოს საპარლამენტო ასამბლეის დოკუმენტებს და მოსკოვის მექანიზმის დასკვნებს.

ავტორი: ექსპრესნიუსი,

სოციალური ქსელები

ირანმა გადაწყვიტა, რომ აშშ-სთან ორკვირიანი ცეცხლის შეწყვეტის ფარგლებში ჰორმუზის სრუტეში გადასასვლელად გადასახადი დააწესოს

ტრამპმა ირანთან ომში ორკვირიანი ცეცხლის შეწყვეტა გამოაცხადა. თეირანმა შეერთებულ შტატებზე „დიდი გამარჯვება“ გამოაცხადა.

დიდი ბრიტანეთი ტრამპს აუკრძალავს მისი ბაზების გამოყენებას ირანის ხიდებსა და ელექტროსადგურებზე თავდასხმებისთვის

სახელისუფლებო აქტორებმა პატრიარქის სახელი ოპონენტების დისკრედიტაციისთვის გამოიყენეს