ეროსი კიწმარიშვილის იარაღზე უცხო პირის დნმ აღმოაჩინეს

2015-04-11 11:00:02, 699 ნახვა

სამართალი

ეროსი კიწმარიშვილის ცეცხლსასროლ იარაღზე უცხო პირის დნმ-ის არსებობა სამხარაულის სახელობის ექსპერტიზამ დაადასტურა.

ამის შესახებ გარდაცვლილის ძმამ, ზურა კიწმარიშვილმა „რუსთავი 2“-ის ეთერში განაცხადა.

კიწმარიშვილის თქმით, დნმ-ის იდენტიფიცირებისთვის გამოძიებამ სატელეფონო ანძების შემოწმება დაიწყო. თუმცა ვისი გენეტიკური მასალა აღმოჩნდა იარაღზე, რომლითაც გასროლა მოხდა, პროკურატურამ ჯერჯერობით ვერ დაადგინა.

მისი ინფორმაციით, პროკურატურამ იარაღზე აღმოჩენილ დნმ-ს 10-მდე პირის გენეტიკური ანალიზი უკვვე შეადარა. მისივე თქმით, გამოძიებამ ის პირები შეამოწმა, ვინც ეროსი კიწმარიშვილი გარდაცვლილი პირველად ნახა.

„ეს არის უცხო დნმ-ი, რომლითაც შესაძლებელია პიროვნების იდენტიფიკაცია. მნიშვნელოვანია ის მოქმედებები, რომლითაც შესაძლოა გამოიკვეთოს ის ადამიანები, რომლებიც შესაძლოა კავშირში იყვნენ მომხდარ ფაქტთან“, - აცხადებს ზურა კიწმარიშვილი.

ამასთან, კიწმარიშვილის ოჯახის ადვოკატი გაგი მოსიაშვილი საკვლევი ობიექტების რიცხვის გაზრდას ითხოვს.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან