მოსამართლე ტურავა: ნიუსი ინფორმაციის შესანახად გავაზიარე, ეს არ ნიშნავს რომ გაეროს ტრიბუნალის გადაწყვეტილებას არ ვენდობი

2016-03-25 16:29:35, 804 ნახვა

სამართალი

საქართველოს საკონსტიტუციო სასამართლოს მოსამართლე მერაბ ტურავა სოციალურ ქსელში რადოვან კარაჯიჩისთვის გაეროს ტრიბუნალის მიერ გამოტანილ განაჩენის შესახებ ნიუსს იზიარებს.

ნიუსის ავტორია საინფორმაციო პორტალი tb.24.ge. ინფორმაცია რუსულ წყაროებს ეყრდნობა. ნიუსში გაეროს ტრიბუნალის გადაწყვეტილება გაკრიტიკებულია და იგი ეროვნულ გმირად არის შერაცხული, მაშინ როდესაც იგი სრებრენიცის გენოციდისთვის გაასამართლეს.

ნიშნავს თუ არა ეს იმას, რომ მერაბ ტურავა გაეროს ტრიბუნალის მიერ გამოტანილ გადაწყვეტილებას არ ეთანხმება? ამ საკითხის დასაზუსტებლად „ექსპრესნიუსი“ მოსამართლე ტურავას დაუკავშირდა, რომელიც ამბობს, რომ ნიუსის შინაარსს არ გაცნობია და ისე განათავსა ის თავის გვერდზე.

ცნობისთვის, მერაბ ტურავამ აღნიშნული ნიუსი facebook-ის საკუთარი გვერდიდან ჩვენი ზარის შემდეგ წაშალა.

„არა ეს არანაიარად არ ნიშნავს იმას, რომ მე არ ვენდობი გაეროს ტრიბუნალის გადაწყვეტილებას. განაჩენი, რომ დადგა იმის აღსანიშნავად გავაზეარე. რამე კომენტარი მაქვს გაკეთებული? - არა მგონია. მე შინაარსი არც წამიკითხავს, რა წერია ტექსტში არც ვიცი. გაეროს კრიტიკაა? - არც ის ვიცოდი თუ ეს რუსული ვერსია იყო. შინაარსს არ ვიზიარებ, ვინაიდან როგორც გითხარით არც გავცნობივარ, ეს გავაზიარე იმიტომ, რომ განაჩენის გამოტანის შესახებ ინფორმაცია შემენახა, რათა ინფორმაცია არ დამკარგვოდა“, - განუცხადა „ექსპრესნიუსს“ მერაბ ტურავამ.

ცნობისთვის, 24 მარტს გაეროს საერთაშორისო ტრიბუნალის სასამართლო კოლეგიამ ბოსნიელ სერბთა ყოფილი ლიდერი რადოვან კარაჯიჩი კაცობრიობის წინააღმდეგ ჩადენილ ბოროტმოქმედებაში დამნაშავედ ცნო.

497-დღიანი სასამართლო პროცესის შემდეგ 24 მარტს გამოცხადებულ ვერდიქტში ყოფილი იუგოსლავიის თაობაზე მოქმედმა ჰააგის ტრიბუნალმა დადასტურებულად ჩათვალა კარაჯიჩის მიმართ წარდგენილი რამდენიმე ბრალდება, მათ შორის სრებრენიცის გენოციდი 1995 წელს. თუმცა, სასამართლომ გენოციდად არ ჩათვალა სამხედრო ალყის კამპანია, რის გამოც ბოსნიის ქალაქებიდან დიდი რაოდენობით ბოსნიელი მუსლიმანი და ეთნიკური ხორვატი გაიხიზნა.

მას სასჯელის სახით 40 წლით თავისუფლების აღკვეთა მიესაჯა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან