ზაქარია ქუცნაშვილი: მე ნუ დამაბრალებთ, რომ ნინო გვენეტაძის მოსასმენად 15 წევრიდან მხოლოდ 6 გამოცხადდა

2015-02-23 15:43:24, 509 ნახვა

პოლიტიკა

"მე ნუ დამაბრალებთ, რომ ნინო გვენეტაძის მოსასმენად 15-წევრიდან, მხოლოდ 6 გამოცხადდა",-ამის შესახებ საპარლამენტო უმრავლესობის წევრმა ზაქარია ქუცნაშვილმა ჟურნალისტებს განუცხადა.
ქუცნაშვილის თქმით, თავად ფრაქციის სხდომას დაესწრება, მაგრამ ნინო გვენეტაძის კანდიდატურის გარშემო განხილვაში მონაწილეობას არ მიიღებს.
"დავესწრები და ვიღებ ამ დახელმწიფო ღონისძიებაში მონაწილეობას.იურიდიული კომიტეტის სხდომაზე თუ ვინმეს მისვლის სურვილი ჰქონდა, გზა ხსნილი იყო. ასე რომ, მე ნუ დამაბრალებენ იმას, რომ 15-წევრიდან მხოლოდ 6 გამოცხადდა.დავესწრები ფარქციის სხდომას, მივმართავ ჩემს კოლეგებს, მაგრამ კანდიდატურის გარშემო განხილვაში მონაწილეობას არ მივიღებ, რომ გავლენა არ მოვახდინო და არ შევზღუდო ჩემი კოლეგები გადაწყვეტილების ჩამოყალიბებაში. ასე რომ, მე ამას ვეძახი არა პროტესტს, არამედ ახალი პოლიტიკური კულტურის გამოვლინებას",-განაცხადა ზაქარია ქუცნაშვილმა.
ცნობისთვის, უზენაესი სასამართლოს თავმჯდომარეობის კანდიდატის ნინო გვენეტაძის მოსასმენად პარლამენტში დეპუტატები არ მივიდნენ. ქვორუმისთვის 8 კაცი იყო საჭირო, თუმცა იურიდიული კომიტეტის სხდომაზე მხოლოდ 6 დეპუტატი გამოცხადდა. შესაბამისად, ნინო გვენეტაძის პირველი მოსმენა ჩაიშალა.
სხდომაზე არ მივიდა დეპუტატი ზაქარია ქუცნაშვილიც, რომელიც ნინო გვენეტაძის მსგავსად უზენაესი სასამართლოს თავმჯდომარის თანამდებობაზე იყო წარდგენილი.